Cabinet Committee on Economic Affairs (CCEA) chuan Scheduled Tribe-te hmasawnna tura duan hamthatna hrang hrangte chu March, 2020 thlenga hman zui turin a pawm.
Cabinet meeting neih zawha thuthar lakhawmtute a kawmnaah Finance Minister Piyush Goyal chuan he hamthatna hi Scheduled Tribe mipui vbc 10 velin an hlawkpui dawn tih a sawi a, sum ruahman zat hi a vaiin Rs. Vbc 11,900 a nih thu a sawi bawk a. Scheme hnuaiah hian tribal-te chenna hrang hrang tihchangtlun te, an khawsak phung chawi kanna tur te, hriselna, zirna leh thil dang dangah hlawkna um lova inpe pawlte kaltlanga tihhmasawnna tur kalpui a nih tur thu a sawi.
Union Cabinet hian The Constitution (Scheduled Castes & Scheduled Tribes) Order (Amendment) Bill ruahman pawh a pawm a, he bill hi Chhattisgarh-a Bhuinya, Bhuiyan, Bhuyan, Dhanwar, Dhanuhar, Dhanuwar, Nagesia, Nagasia, Kisan, Oraon, Dhanka, Dhangad, Sawar, Sawara, Saunra, Saonra leh Binjhia hnamte chu ST-ah ziah luh theihna tur a ni a. Bill hi dan a nih hnuah chuan ST-a tel mek hnamte chu ennawn niin telh thar an ni thei dawn a ni.
Cabinet hi nimin khan thukhawmin March 31-a an hun hmang zo tawh tur, National Commission for Safai Karmacharis (NCSK) pawh kum 3 dang awm chhunzawm tura tihna an pawm a. Hei bakah hian ram Delhi-a Alipur-a ram acre 1.61-a zau chu Small Farmers Agribusiness Consortium (SFAC)-in Kisan Mandi an sakna tur atana pek turin an pawm a, Kisan Mandi hi farmer producer organisations (FPOs) leh anmahni dawrtute tana hamthatna tur a ni ang.
He ram hi sorkar enkawl, Delhi Milk Scheme (DMS) ta a ni a, SFAC hnena a luh hnuah hi chuan pawl, retailer, wholesaler, hotel & catering institution, resident welfare association leh consumer tu pawhin anmahni kaltlangin an luah/lei chhawng thei dawn a, agent hranpa pawh a ngai dawn lo a ni.
Cabinet meeting hian Pasteur Institute of India (PII)-in hrileng thin danna tur vaccine siam chhuahna hmun din nana an hman turin Coonoor, Tamil Nadu-a mi pawh pek an remti a. He project hnuaiah hian hri leng thin hrang hrang danna (vaccine) – TCA anti-measles vaccine, Japanese encephalitis leh anti-sera te siam chhuah tum a ni a. He hmunah a nih tur anga vaccine siam chhuahna a din hnuah chuan nunna tam tak chhanhim theih phahna ni tura ngaih a ni.