Europe-a thlawhna siamtu lian, Airbus chuan khawvela passenger phur thlawhna lian ber, A380 ‘superjumbo’ an siam chu an tawpsan dawn.
Company-in thuchhuah an siamah he thlawhna lian hi kum 2021 atang chuan an siam chhunzawm tawh dawn lo tih an sawi a. Hei hi a chhan chu A380 leisak tam ber, Emirates-in an leisak (order) zat nasa taka an tihtlem tak vang a ni.
Thlawhna lian ber hi a man a to va, thlawhna tê leh tha, chak zawk dangte an chhuah zel avangin a hralh a kal vak tawh lo a ni.
Nimina Airbus-in thuchhuah an siamah Emirates hian A380 thlawhna an order chu 162 atangin 123-ah an tihniam a. Chief executive Tom Enders chuan hetianga anmahni dawrtu lian berin an mamawh zat an tihtlem tâk duai avang hian kum 2021 atang chuan a siam chhuah an titawp dawn tih a sawi a, “Passenger-ten he thlawhna liana chuan hi nuam an ti a; mahse, hreh takin he thu hi kan puan a ngai ta si a ni,” tiin a sawi.
Airbus A380 hi nikum chhung khan an hlawkpui hle a, £ tld 2.6 vel hlep neiin a hma kum aiin 30% zetin an hlep hnem zawk a. Kuminah pawh thlawhna 880 atanga 890 vel siam chhuah tura ruahman a ni.
Kum 2007 atanga service tan, he thlawhna lian hi miin duh hle mah se a sakna senso a sang hle a. Europe-a a hmangtu hrang hrangten tun hnaiah an hmang tlem hret hret a, thlawhna tê zawk, a taksa (body) hlai zawk duh zawkna a lo len zawk zel bawk avangin hralh a kal tawh vak lo.
Anmahni dawrtu lian ber, Emirates hnenah pawh A380 hi kum hnih lo awm leh tur chhung hian 14 an pe ang a, Dubai-a hmunpui nei hian thlawhna tê zawk 70 zet hmun dang atangin an la turin ruahmanna an siam fel vek tawh thung a ni.