- C. Laltanpuia, Chanmari, Aizawl
Tunlai uisa ei leh ei loh chungchang sawihona leh inhnialna tam tak awmah hian hetiang hian ngaihdan han tarlan ve ka duh a, Mizote hi kan society inkaihhruaina naupang leh tha tawk lo lai tam tak nei kan nih bakah kan ram hruaitu lo ni tawh ten inkaihhruaina tha min chhawpchhuah sak loh avangin intodelhna kawngah pawh kan hnufum em em a, chutichung chuan hnam dang kara kan khawsakna kawngah erawh kan duai ngai lova, thenkhatin Pathian hnam thlan Israel hnam thlah kalzel kan ni an tih pawh hi lo dik chiah lo pawh nise, Kawng hrang hrangah Pathian vohbik hnam tih loh rual kan ni lova. Pathian duhsakna zofate hian kan va dawng nasa tehreng em.
Zirmi te chuan Mongolian thlah kalzel kan ni an ti a, chung zingah chuan zofate hi a hmeltha pawl leh a hleitling pawl tak kan ni awm e, Guwahati a kan thian ukil pakhat phei chuan ‘Aizawlah kan thian hovin kan kal tawh a, hmeltha khawpui tiin kan sawi thin’ tiin min hrilh ve hial a ni. Heti khawpa a pian tha tha te ruihhloin min suat sak chung pawh a fakna kan la dawng cheu hi a lawmawmin a inthlahrunawm mah mah zawk a ni. Ram hmasawnna leh changkanna milin ei in tha te nen kan tu leh fate kal zel phei chu pumruaah pawh zahpuiawm lo tak niin a nawlpui hian kan la lian telh telh dawn ni te pawhin a hriat a. Kan mongolian pui ram thenkhat changkanna leh hmasawnna in alo thlen tawh ram heng Singapore, Indonesia, Thailand, Myanmar leh China te hi kum tam tak an lo intuituah tawh a mahse an lian ve thei mang reng reng lo, chuvangin min duhsak bikna hi haider rual a ni lo a ni.
Heng vangte pawh hi a niang Pathian zawnchhuah ram, a rawngbawl tura a hnam thlan ni a kan inhriat tlat nate pawh hi. Hnam dang ten an hrilh harh theih loh pawh hi mizo missionary ten an hrilh hi chuan kristian-ah an siam leh mai thin. Hei hi mizote kan danglamna tak, Pathian hnam ruat bik kan nihna te pawh a tih theih awm e. Engpawhnise, kan han sawi duh lai tak chu Pathian nung ringtute, a rawngbawl tura a belruat kan ni a, chuvangin ringtute chu mahni tana nung kan ni lova midangte tana nung tawh zawk tur kan nih avangin kan Pathian thu hrilhna missionary na tur hnamdang ten ui chu mihringte tana rinawm tak mihringte tana thian tha ber, mihringte ngaina a hmangaih em em tu chhungkua member tluka an ngaih anih avangin uisa kan ei thin tih an hriat chuan kan rawngbawl saka te hian mihring sa ei tluk hiala ngaiin min hrethiam thei ngai dawn lo a ni. Pathian rawngbawlin chhuak ve kher lo mahila a tithuanawp tu nilo hram ila, hlain ka tih thinte ka tih a rem tawh lova ka tih ngailoh te tih a tul tawh zawk atih angin inlam atanga theih ang tawka lo support tu tal nih tum ila ava dik zawk dawn em.
Pathian thianghlim leh ropui zuitu kan nih angin phai rama an bawlhhlawh tinreng leh kutdawhte ek tlantu sa ei thin hnam kan ni tih hretute hian min ngaisang lo mai ni lovin min hmuhsit phahin min lo ten ru viau mai lovang maw. Lalpa kan Pathianin a dah pawimawh em em chu thianghlimna hi a ni a, chumi thu zawma thianghlimna Lalpa zuitu tan uisa ei chu thil inhmeh lo tak te pawh a ni awm e. Chuvangin ringtu tih atan a thil mawi lo tak anih mai bakah hnam ang pawh a thil hmuhsitawm leh mualphona thlen theitu anih avangin kan pi leh pute chuan lo ei thin pawh nise kawng tam takah a chhe lamah a ber nihna kan lo hauh tawh thin mah a hrehawm tehlul nen kan mualpho tizual thei tu lakah hi chuan kan insum theih a va duhawm em, vawiin ni a thangthar zawk te hi chuan kan ram leh hnam alo mawi zual zel nan i ei lo ve mai zawk ang u hmiang.