Mizorama pawl lian ber YMA khawmpui lo awm tura thurel turah kan ram environment humhalh that dan tur thu chu an dah tel ta a. Hmasawnna hnathawh reng rengin ram a tihchhiat lohna tur chu YMA khawmpuiin a rel dawn a ni. Khawvelin a buaipui mek environment chungchang YMA khawmpui agenda hiala a lut ta hi a lawmawm hle mai. A lawmawm rualin kan ram tan he agenda ngaihtuah hi hmasawnna nasa takah a ngaih theih bawk ang. Mizoten ngaihtuah tur dik tak kan vei ve ta pawh ti ila a dik viau awm e. Hmasawnna pakhatah ngai phawt bawk ila.
Kan ram kan sawisak dan duh dah lutuk avanga nakin huna awmna tlak loh a chhuah theih anih thu kan sawi thin. Tunah ngei hian kan ram tih chhiatna chu keimahni ngeiin a bul kan tanin kan tuar mek tawh a. Sawrkarin kawngpui an lai a, kawngpui laihin a nghawng chu a rapthlak dan kan hria. An leivung paih duh dah lutuk vangin kan lui a chhia a. Luia nungcha zawng zawngin an tuar a. Kan tuihna a kang a. Eizawnna pawimawh leilet tam tak chu neih leh chi loh khawpin a chhia a. Kan kawngpui laihin a tihchhiat ram chungchang chu thuhran nise, kan sik leh sa a nghawng zel dan tur chu chhut phak pawh ani lo hial ang. Nakinah thangthar ten an la tuar dawn ani an tih pawh hi a dik vek chuang lova. Nakin nilovin, tunah hian kan tuar mek a ni.
Hmasawnna hna thawh dawn chuan environment chuan tawrh chin chu a nei ngei mai thin. Mahse, tuna kan thawh danah hi chuan rapthlak khawpa ram tihchhiat nen a inzawm ta mai emaw tih tur hial a ni a. Hmasawnna hnathawh hian a thawktute, a chhehvela cheng zawng zawngte hian ram tihchhiat kan hlau ngawih ngawih tur a ni a. Tin, dan bawhchhiatna nasa tak ani tih pawh hi kan hriat reng a tul bawk. A thawktute hi chuan a awlsam thei ang ber, a hlawk thei ang bera thawh an duh thin. Helaiah tak hian ram neitu thinlung pu chunga sawrkar leh mipuiin kan lo en reng a ngai fo thin. Kan mimal huana kawng kan sial dawnin kan thlaite tichhe lo thei ang bera kawng sial kan duh thin. Chutiang bawk chuan kawngpui laih ani emaw, hmasawnna hna thawh reng rengah a bula thil awmten an tawrh loh dan ber kan ngaihtuah thin tur a ni. Mi rama hnathawk ang maia tute emaw an tal dawna, a huan neituin a khak thin ang khan kan ti tur a ni ang.
Tin environment chungchanga inzirtirna nasa zawk hi kan mamawh a. Kan thing leh mau leh a ram hrim hrim kan dim lohna chhan hi sual vang emaw ani lova, a pawimawh dan hriat tawk loh vang ani ber a. Thingkung pakhat kih pawh hi thil uiawm lutuk ani tih kan hriat a ngai. Chutiang rilru kan put theih hunah chuan kan ram hi ram nuam leh ropuiah kan chhuah ngei ang. Hawh u, kan ngaihtuahna thlakin kan ngainat leh duh ngawih ngawih kan ram hi ti parvul leh turin hma i la ang u.