Aizawl: Mizoram Pradesh Congress Committee (MPCC) Vice President Lalnunmawia Chuaungo leh Japanese Embassy-in Mizorama a tirh, Orita Kentaro, Ministry of Foreign Affairs of Japan – Diplomat te chu nimin khan Congress Bhavan-ah an inkawm.
Kentaro chuan embasssy-in Mizoram zirchiang tura a tirh a nih thu a sawi a. Japan chuan India hmarchhak a ngaihven thu leh investment pawh a tih nasat thu a sawi.
“Japan-ah thalai hnathawk tur pawh kan duh a, hna a tam em em a ni. A bik takin caretaker kan mamawh a, hei bakah hian agriculture, hospitality leh construction lamah pawh hnathawk tur kan mamawh takzet,” a ti.
Lalnunmawia Chuaungo chuan Mizoramah thalai tha leh thiam tak tak an awm thu sawiin Japan-a hnathawk thei tur an tam thu a sawi a. Amaherawhchu, an ngaih pawimawh hmasak ber chu hnathawkte himna a nih thu a sawi.
Congress vice president chuan, “Tun hnaiah kan thalai ram danga hnathawka awmten harsatna an tawk chamchi a, hei hi kan duh lo. Agency rintlak, Japan sorkarin a pawmpuite an awm ngei tur a ni. Dik lo taka inbumnaa tam a, embassy-in rintlak a tihte nen chuan kan thawkho thei,” a ti bawk.