Aizawl: South Tuipui bialtu, Health Minister Dr. R.Lalthangliana’n nimin khan MNF South Tuipui West Block buatsaih MNF South Tuipui Block Meet a hmanpui. Nimin vek khan Hnahthiala Mizo Hnam Run sak thar a hawng nghal bawk.
Hnahthial Bazar venga RD Conference Hall-a Block Meet hmanpuitu Dr R Lalthangliana chuan, Congress sorkarin kum 10 chhunga thil tih theih loh bur anga an sawi chu, MNF sorkar atanga thla riat lekah an intiam tawh angin Hnahthial, Saitual leh Khawzawl district te chu fuke kuma an tihpuitlin nghal thu a sawi a. District thar pathum tan district hospital lian, Rs. nuai 1,700 theuh senga sak tur chu a lung phum thuai a nih tur thu a sawi bawk.
Dr R Lalthangliana chuan Covid-19 leng karah district tharin a ken tel, tun hmaa an la neih ngai loh thil thar tam tak a bial chhunga an neih thar thu a sawi a. District-in a ken tel sub-division neuh neuh la tihhlawhtlin tur, la zawh hman loh a tam tam thu a sawi a. A agenda la zawh lohte chhunzawm turin amah leh MNF official MLA candidate dangte thlang tling leh turin mipui a sawm nghal.
MNF Adviser ni bawk Dr R Lalthangliana chuan, Hnahthial Peniel venga Mizo Hnam Run sak thar a hawng nghal bawkin, he building hi chhawng nga-a sang, bialtu MLA hmalakna azara puitlin a ni.
Mizo Hnam Run hawnna inkhawmah Lalrintluanga Sailo, MLA, Dy. Govt. Chief Whip pawhin thu a sawi bawk.