Man Utd winger Jadon Sancho chuan first team training zawm lovin a hrangin training a nei dawn a, manager Erik ten Hag nen an inkar chinfel a nih hma chu first team a zawm dawn lo.
Ten Hag hian Arsenal nena an inkhelh tumin Sancho hi squad-ah a telh lova, a player hi training-ah a inpek tawk loh avangin telh a ni lo tih inkhel zawhah a sawi.
Kum 23 mi Sancho hian a manager thusawi chu dik lo niin a puh zui a, hei bakah hian hun engemaw chen atangin mawhpuh theih tur dinhmunah dah a ni fo thin nia a ngaih thu a sawi.
United hian Sancho chungchang thuchhuah siamin mahni a training neih tir a nih tur thu an sawi a, squad discipline chungchangah chinfel ngaite tihfel a nih hma chu first team training ah a tel dawn lo tih an sawi.
Tunkar khan Sancho leh manager hian Carrington a an hmunpuiah inbiakna an nei nia sawi a ni a, nimahsela Sancho hian thupha a chawi duh loh avangin hetianga hma lak a ni a. An inkar hi chinfel theih a nih loh chuan January thla hian United hian kar khat a Pound 350,000 vel hlawh nia ngaih an winger hi an hralh dawn niin chanchinbu thenkhatin an sawi.
Kum 2021 a Pound maktaduai 73 a Borussia Dortmund atanga Old Trafford a pan hnuah Sancho hi beisei angin a la che tha tawk lova, Premier League match 58 atangin goal 9 leh assist vawi 6 chiah a la nei.