Aizawl: Chief Minister Zoramthanga chuan, “Tun hnaia ramin harsatna a tawh hrang hrangte hian mahni kea din a pawimawhzia min zirtir,” a ti.
Zirtawpnia Mizoram Engineering Service Association (MESA)-in Annual General Conference vawi 42-na, Berawtlang Multipurpose Hall a buatsaih chu khuallian nia a hmanpuinaah Zoramthanga chuan Covid-19 avangin sorkarin sum leh pai harsatna nasa tak a tawk a, tun kum thum chhung hian central sorkarin a pek theih tura an ngaih, budget-a dah tura a tih vek tawh, a pek theih leh tak loh hi Rs. vaibelchhe 3,500 vel a tling phak niin a sawi.
Zoramthanga chuan harsatnain a delh avangin sorkar hna lakah leh kawng dangah pawh an duh leh tum angin an kal thei rih lo tih sawiin, “Hei hi kan inhriatpui a tul hle a, kan beisei lawk loh harsatnain min chim nasa a ni. Pathianin min khawngaiha hun tha kan nei leh a nih chuan kan beisei leh tum ang takin a tul apiangah nasa zawkin kan la thawk zel dawn a ni,” a ti.
Tun hnaia ramin harsatna a tawh hrang hrangte hian mahni kea din a pawimawhzia a zirtir tih sawiin Zoramthanga chuan, “Pathianin ram tha tak min pe a, kan leilung, boruak leh tuihna te, lei hnuai hausakna chenin mal min sawm nasa hle. He ram thatna haichhuak a, hmang tangkai a, mahni intodelh rama chantir turin engineer-ten tam takin mawh kan phur a ni tih kan rilruah awm reng ka duh hle,” a ti bawk.
Zoramthanga chuan vawi leh khatah sang taka thlen theih ni lo mah se, hmathlir fel tak nei chunga hma an lak a pawimawh thu a sawi a. An hmabak awm mek hi engineer-ten anmahni zawnah chonaah ngaia mi dangte pawhin mahni hma zawnah theuh bei sauh sauha ram tungding tur hian an kovah mawhphurhna a awm theuh tih a sawi bawk.
Inkhawm hi Er. H. Zoramliana, Vice President, MESA-in a kaihruai a. Khuallian Zoramthanga hian MESA souvenir a tlangzarh nghal a ni.