Aizawl : Nimin khan Mamit District Football Association (MDFA) buatsaih in Laldenga Football Ground, Tuidam-ah Mamit DFA All Star team leh Tripura Group YMA Team ten Inpumkhatna Exhibition match an nei a ni. Inkhelh tan hma in programme tawi neih niin Roluahpuia, Sr. Vice President, MDFA in a kaihruai a, Lalropuia, Hony. Secretary MDFA in inhmelhriattirna leh report a pe bawk a ni.
MDFA Silver Jubilee lawmna chikhat atana Exhibition Match buatsaih hi R. Lalrinmawia, SSPO, Mizoram State Sports Council chuan hman pui in thusawina a nei a. Mamit District Football Association in an Silver Jubilee lawmna lawmna pual a Inpumkhatna match an buatsaih chu a finthlak in lawmawm a tih thu a sawi a, he Inpumkhatna match hian hun lokal zel turah Mizoram a bik takin Mamit District leh Tripura Jampui tlangdung a Mizote nen in unauna leh inpumkhatna tha zawk a thlen a beisei thu a sawi a. Tin, Mamit District in Sport Infrastructure lamah hmasawnna nasa tak an nei chu lawmawm a tih thu a sawi a, Robert Romawia Royte, Sports Minister ruahmanna angin hmasawnna hnathawh tur ruahmanna siam mek pawh tam tak a awm thu a sawi bawk a ni.
Lairokhuma, President MDFA pawh in thusawi in, Tripura Group YMA in MDFA sawmna anga Exhibition match an neih pui avangin lawmthu a sawi a ni. Tin, Robert Romawia Royte, Sports Minister hmalakna avanga Mamit District ah Ground Pathum ngawtah Phullem zawh a ni tawh chu Football hruaituten lawmthu kan sawi a ni a ti a, Inpumkhatna inkhelh buatsaih a nih theih nana tanpuitu Sports Minister chungah lawmthu a sawi bawk a ni.
Lalhuma, Treasurer, Sub-Hqrs. YMA Mamit pawh in thusawi in Zofate inpumkhat nana MDFA hmalakna chu lawmawm a tih thu a sawi a, he inkhel hian hun kal zel turah rah tha a chhuah a beisei thu a sawi a ni. Kapchawla, VCP Tuidam pawh in thusawina a nei bawk.
Exhibition match Mamit DFA team leh Tripura Group YMA team te inkhelhah Mamit DFA team in 6 – 1 in hneh na an chang a ni.