England defender Kyle Walker chuan Manchester City hnenah kum hnihin a contract neihlai a pawtsei.
Kum 33 mi hian a contract neihlai a kum hnuhnung ber a hmang tawh a, tun nipui khan contract a neih rei tawh loh avangin German champion Bayern Munich chuan an ngaihven ngawrh hle a, a aiawhte nen inbiakna pawh engemaw chen a kal hman niin an sawi.
Walker hian kum ruk hun a hman tawhna City-ah hian trophy lian 13 a la tawh a, a contract thar ziah avang hian kum 2026 thleng an hnenah a cham dawn tihna a ni.
“Contract thar ka ziak avang hian ka phur a, ka hmalam hun hi Manchester City-ah hian a awm a, hei hi ka tana thil tha ber a ni.” a ti.
“He club tha tak hnenah hian kum ruk duhawm tak ka hmang tawh a, coach tha tak hnuaiah ka inkhel a, teammate ropui tak takte leh staff tha tak takte kan nei a ni. Kan fans te hi fans tha ber an ni bawk a, engkimah tupawh hian min thlawp em em mai zel tih ka hria.” tiin a sawi.
Walker hian kum 2017 August khan Tottenham Hotspur atangin Manchester City hi a zawm a. Season liamta khan inelna hrang hrangah vawi 39 inkhel mahse UEFA Champions League final a Inter Milan an hmachhawn tumin bul tan tir a ni lo.
Season liamta khan Walker hian starting XI-ah hmun nghet a chan reng chu hlohin bench-ah dah a ni leh thin a, a coach Pep Guardiola in season chawhnu lama a tactic hman a tlarhnung a rem dan chuan Walker chu a mil ve lo nia a sawi chu amah Walker hian thil hriat nuam a ni lova, a tih lawm loh thu a lo sawi tawh.
Nimahsela July thla khan Guardiola hian Bayern Munich nen sawizawm a nihin Walker chu chelh zui zel a duh thu a sawi a ni.
Tun season-ah Walker hian Premier League match li an khelh tawh leh UEFA Super Cup-ah te bul a tan vek a, match li-ah captain mawhphurhna a la bawk.