Aizawl : ZPM Working President K Sapdanga chuan ZPM policy in Zoram dung leh vang a deng chhuak nia a hriat thu a sawi.
Hrangturzo bial khaw hrang hrang fanga N Mualcheng, Bawktlang, N Vanlaiphai, East Lungdar leh Biate khuate a tlawhnaa vantlang inkhawmahte thu sawiin K Sapdanga chuan, tunah hian party thenkhat hian hlauh leh huphurh an nei a, chu chu ZPM a sorkar hi a nih thu a sawi.
K Sapdanga chuan, inhlan hmachhawn reng rengin tunge ram hruai dawn tih hi ngaihtuah a tul tih sawiin, “Party chauh ni lovin an policy-te kan zirchiangin kan khaikhin thin tur a ni. ZPM hian thalaite kan focus nasa dawn a, thalai taima leh thiamna nei te an banah kaiin kan khai chhuak dawn a ni,” a ti.
ZPM policy te hian Zoram dung leh vang a deng chhuak nia a hriat thu sawiin K Sapdanga chuan, “Political party ten kan policy te kan au pui mek a, mi mal leh pawl anga inbei vak vak lo hian policy hmang te hian in bei ta ila, kan ram hian hma a sawn zawk ang,” tiin, ZPM te hian vote ringawt an buaipui loh thu leh, tute nge dawmkan ngai, tute nge tanpui ngai tih chu an thupui pakhat a nih thu a sawi.
Chhungkaw tinte hmasawntir an duhna kawngah ZPM chuan sem policy an duh lo mai ni lo vin, an do tlat tih a sawi a. “ZPM candidate-te hian chief ministerial candidate-in hmahruaiiin, eiru lo turin kan intiam a. Corruption hi awm lo se la, tun ai hian kan hrisel zawk kan ring a, kan kawngte hian hei ai hian hma a sawn kan ring a, kan zirnate hian tun ai hian hma a sawn zawk kan ring a ni,” a ti bawk.
He hunah hian Hrangturzo bial-a ZPM candidate Lalmuanpuia Punte pawhin thu a sawi a ni.