Brazilian Amazon-a Inrinnia khaw chhe tak hnuaia thlawhna tlaah mi 14 an thi.
Thlawhna tê chi hi Amazonas state khawpui, Manaus atanga thingtlang hmun kilkhawr tak, Barcelos pana thlawk niin km 400 vel a thlawh turah a tum ram a thleng tep tihin a tla a ni.
Thuneitute chuan a mi chuang zawng zawng, passenger 12 leh thawktu pahnih an thi vek tih an sawi.
An tlak chhan hi chhui zui nghal mek a ni.
Amazonas state security secretary Vinicius Almeida chuan an hriat dan chuan thlawhna hi Barcelos-a a tum dawnah ruah nasa tak sur leh khaw hmuh theih mumal loh karah a tumna tlankawng a tlan pel niin an hriat tih a sawi.
Brazilian news site G1 chuan thlawhna hi EMB-110 niin twin-engine turboprop a ni a, Brazilian aircraft-maker Embraer siam a ni.
G1 chuan thlawhna neitu, Manaus Aerotáxi chuan a thawk leh an thlawhna chuan thlawk tura mamawh zawng zawng an nei kim vek niin an sawi tih a tar lang.
“Kan team chu a hmunah tih theih ang ang ti turin an awm mek a ni,” tiin Amazonas Governor Wilson Lima chuan X-ah a tar lang.
“A tuartu chhung leh thian thate ka tawrhpuiin ka tawngtaipui a ni,” a ti bawk.
Barcelos Mayor Edson de Paula Rodrigues Mendes chuan thlawhna hi sumdawng pakhatin sangha mana infiamna chi khat a buaipuina atan a hman (charter) niin CNN hnenah a sawi.
Mendes-a hian a chuangte pawh hi Brazil hmun hrang hranga cheng, inthian tha, infiamnaa tel an nih hlawm thu a sawi bawk.
Thuneitute chuan ruang hi Manaus-ah lain tute nge an nih hriat an tum dawn tih an sawi.
Barcelos hi khualzinten an tlawh tam tak hmun niin national park eng emaw zat hnaiha awm a ni.
September hi Amazonas-ah chuan sangha man hun vanglai tak intan hun a ni a. He state hi sangha danglam tak tak tamna hmun a ni a, heng zingah hian tucunaré, peacock bass an tih bawk pawh a tel.