ZPM Leader Lalduhoma’n Mizoram sorkar leiba tam tak inchhekkhawl mek chu tun sorkar lai mek leiba chauh ni lovin, sorkar hmasa atanga inchhekkhawl zel a nih thu a sawi chu Congress party chuan an ngaih thutak thu thuchhuah siamin an tar lang.
Congress party chuan September 15, 2023-a ZPM Champhai North Block Conference a hmanpuinaa ZPM leader thusawi chu chhang letin, “MNF sorkar apiangin Mizoram sorkar leiba a pung nasa tih hi thudik a ni. Pu Lalduhoma sawi angin kan leibate hi GSDP atanga teh tur a ni bawk. MNF sorkar term hmasa lamah khan Mizoram sorkar leiba chu kum 2004-ah GSDP atanga tehin 102% a ni a. 2005-ah 108.9% a ni. Kum 2006-ah 106.2%, 2007-ah 101.9% leh 2008-ah 103.5% leiba a nei a ni,” an ti.
Kum 2008 atanga Congress a sorkar atang khan leiba nasa takin a kiam nia tar langin Congress party chuan, “Kum 2018 Congress term tawpah Mizoram sorkar leiba chu 32%-ah tla thlain MNF sorkar leibat sa, GSDP atanga teha 71.5% lai Congress sorkar khan a rul a. Hei mai ni lovin June 30, 2016-a RBI-a Ways & Means hmanga a sum puk kha Congress sorkarin Ways & Means hmanga a sum puk hnuhnun ber a ni nghe nghe,” an ti bawk.
Assembly house-ah ngei pawh Lalduhoma hian Mizoram leibat chungchang sawiin, ‘2018-2019 a Congress a tlak kum khan fiscal deficit hi Rs vaibelchhe 352.93 kan nei a. Chu chu 1.58% a ni. Vawiinah hian khatihlaia Finance Minister Pu Lalsawta khan a ti tha a ni tih ka sawi duh a, ka tan a ni lo, thu dik ka sawi a ni. 3% chin kha min phalsak a. 1.58%-ah fiscal hi a tihniam thei a. A fakawm a ni. Tunah MNF a lo sorkar veleh a, kum khat a han sorkar a, 1.58% atang khan kum khat chhung lekin vaibelchhe 2215 fiscal deficit nei hmanin 8.34%-ah a chho hman a ni,’ tia a sawi pawh assembly proceeding-ah hai theihin a awm vek niin an tar lang.
A awmna hmun azira a thusawi danglam thin, Lalduhoma hian assembly house-a Lalsawta sum enkawl thiamzia a sawi hnua political platform atanga leiba chungchanga Congress hmer tel a tum leh ta mai hi pawi an tih thu sawiin, thu dik hai chhuah mai tur a awm laia mipui bum zawnga thusawi tawh lo turin ZPM Leader Lalduhoma an ngen thu an tar lang bawk.