Anantnag, Jammu & Kashmir-a ramhnuai zau taka venhim hna thawktu sang chuangin mi firfiakte laka beihpui an thlak chu ni nga a tling ta.

Sipai pangngai bakah para commando thawk chhuakte hi Gadol ramngaw chhah takah mi firfiak thah tumin an buai mek.

Ramhnuaia chetla tura inzir chhuak ni ngeia hriat firfiakte hian tlang chhengchhe tak leh ramngaw chu inphen nan an hmang thiam hle.

Inkahna hi Nilaini atanga tan kha niin darkar 100 chuang a awh tawh a, officer pathum an thi tawh a. An zinga pahnih hi Army niin police pakhat a tel bawk.

Ralthuam tha tak tak nena inthuam mi firfiakte hi pahnih emaw, pathum emaw nia hriat an ni a. Sipaite hian tam hneh hle mah se an la hmet mit thei lo zel.

Darkar 100 chuang beihpui an thlak tawh chhungin sipaite hian motor shell leh rocket thahnem tak an kap chhuak tawh a. Tun lai hmanraw tha (hi-tech equipment) nen an tawmna hriat tumin an bei a, drone hmangin puak thei an thlak nasa hle bawk.

Far thing hmunah hian a khât tawkin thil puak ring tak tak leh nasa taka inkap thawm hriat tur a awm reng.

Army-a Northern Command chief Lt General Upendra Dwivedi chuan Inrinni khan sipaite hi tlawhin sipaiten hmanrua leh drone an hman dante a enpui.

Army leh police hian Thawhlehni zan khan thu an dawn bawhzuiin beihpui hi an thlak tan a, a tuk atangin an tawmna hai chhuah tumin an thawk chhuak.

Firfiakte hian sipaite hi an kap a, an chetna hi tlang awihpanga ramngaw chhah tha tak a nih bakah kawr ruam thuk tak a ni tel bawk.

Army officer pahnih, Colonel Manpreet Singh leh Major Ashish Dhonchak leh Deputy Superintendent of Police Himayun Bhat te chu kah hlum an ni a. Sipai pahnihin hliam an tuar bawk a, pakhat chin hriat lohvin a la awm mek bawk.

Venhim hna thawktute ruang hlawm leh hliam tuarte insaseng harsa khawpin an birukna atangin mi firfiakte hian an kap zui bawk.

Army-a assault & climbing team-in tlang chhip lam atanga beihpui thlakin ramngawah hian an luhchilh zui a; mahs,e mi firfiakte hi an that tih finfiahna an la nei thei rih lo.

Nasa taka rocket-a an awmna nia hriat kah a nih hnuah Inrinni chawhnu khan ram pawh a kan phah a; mahse, a kan nasat hmain ruah surin a timit thung.

Beih hautak mi firfiakte

Anantnag-a che mek mi firfiakte hi ramhnuai leh hmun sanga chetla thei tura uluk taka train an ni tih a hriat a, nasa takin an inbuatsaih ni ngeia hriat a ni bawk.

Tuna an chetna hmun ang, tlang chhengchhia leh kawr ruam thuka birukna tur hmun tha hriaa ram hmelhmang hre chuang tur chuan hun rei tak a duh nia sawi a ni a. Hetianga che thiamte hi thuneitute tan pawh an laka chet lak a harsa hle thin niin an sawi bawk.

Heng lai hmuna khuaa venhim hna thawka dahte hi hetiang hmuna chetla thei tura duan an ni a, tun hnai kum eng emaw ti chhungin far hmuna firfiaka chetna erawh a tlem hle thung.

Tun tuma mi firfiakte chetna ang hi Jammu-ah tho hian Poonch leh Rajouri district velah chuan hriat tur a awm zauh zauh thung.

May 10 khan paratrooper panga leh sipai panga chu mi firfiakte chetna hmun hnihah thah an ni a. Hemi tuma a titute hi Pirpanjal ramngawah an bibo zui nghal a, nasa takin beihpui thlaka umzui nghal ni mah se tun thlengin man an la ni lo.

October, 2021 khan Poonch-Rajouri ramngawah sipaiten mi firfiak an beih rei ber tum a lo thleng tawh a. Hemi hma lawk hian mi firfiakten hmun hnihah sipai pakua an that a, hemi bawhzui hian an che chhuak a ni.