AIZAWL: Mizoram Pradesh Congress Committee (MPCC) President Lalsawta chuan Mizoram, Mizo hnam leh sakhua humhim turin tualto party an rintlak loh niin a sawi.
Congress party-in Inrinnia Falkawna Aizawl South III Congress block-in mi thar lawm luh inkhawm an buatsaih hmanpuitu MPCC President Lalsawta chuan Kristiante leh hnam tlem zawkte nuai chimih tumtu BJP chu Mizorama tualto party-te hian do duh mah se, an thei lo tih a sawi a. Citizen Amendment Bill (CAB) pawh an do ti chungin rorel lai MNF party chuan parliament inpuiah an thlawp thu an sawi leh mai tih sawiin, “Congress erawh National party, sakhaw zalenna champion reng leh champion reng tur party a nih avangin kan rintlak ber a ni,” a ti.
Lalsawta chuan kum tam tak central sorkara Congress party vangin India leh Mizoramah sakhaw zalenna an nei tih sawiin, “Kum 2014 atanga Central-a BJP a rawn sorkar chinah sakhaw zalenna chungchangah harsatna kan tawk tan a. Kan missionary leh kan Kohhran lu te an chep tak tak tan ta. Kam ramah ngei hian Hindu lal ram din tumin, kum tam tak hnuah he ramah hian Kristian an awm ve thin, tih tur dinhmunah min siam an tum a ni,” tia sawiin, pawisak nei lo BJP leh a thawhpuite kuta ram hruai hna hlan hi a theih loh a. Mizoram, hnam leh sakhua humhim turin Kohhran, NGO leh party dang te tanho a ngai takzet tih a sawi bawk.
Aizawl South III Congress candidate Rosiamngheta pawhin he hunah hian thu a sawi a ni.