India leh Russia ram tangdun chuan missile tha tak, BrahMos an siam chhuak a, India thenawm leh a hmelma lian, Pakistan chuan China-in tun hnai lawka a enchhin tawh, missile thar, BrahMos aia tha nia an sawi chu lei a tum ve mek nia sawi a ni.
Chinese supersonic missile hi a hming chu HD-1 a ni a, khawvel huapa a tha ber pawla ngaih a ni a. Islamabad chuan a ralthuam neih sate tihchangtluna missile dang laka himna a dap meknaah China lam hi a dawr nia sawi a ni.
China ram chhim lama Guangdong Hongda Blasting Company-in an duan, HD-1 is hi missile, a kah chhuah, missile dang thununna, tum (target) zawnna leh a dang atan pawha hman theih niin tabloid pakhat, Global Times chuan a siamtu company thuchhuah a ziak chhawng nghe nghe a ni.
Tun kar tir lam khan a ruk deuh takin China hian an ram hmar lamah a enchhin tawh a. “HD-1 hian amah anga thiltithei dangte aiin tui (fuel) a mamawh tlem a, thlawh chak thei turin a zâng a, a thlawk hla thei bawk,” tiin Beijing-a military analyst Wei Dongxu chuan a sawi.
A siamtu company hian tam zawk siam chhuak tur leh ram danga thawn chhuak turin sorkarah phalna a nei tawh a. Wei chuan, “Pakistan leh Middle East ramten an ngaihven hle,” tiin a sawi.
India ralthuam tha, BrahMos nen khaikhinin, “BrahMos missile hi a to zawk a, supersonic cruise missile tura duan atan chuan a hmanna a tlem zawk,” tiin Wei chuan a sawi a. ‘Carrier killer’ tia an sawi, BrahMos hi khawvela supersonic missile system chak ber a ni.
HD-1 missile hian eng anga thui nge a kah theih hriat a la ni chiah lo va, Indo-Russian missile erawh hi chu km 300 chuanga mi kap thei a ni.