AIZAWL: Mizo Sunday School Union (MSSU) hnuaia Senior Department Inkhawmpui chu nimin khan neih a ni a, Presbyterian Kohhran hnuaia Bial hrang hrangah inkhawmpui hi hman a ni.
Senior department inkhawmpui hi Pastor bial thenkhatah chuan Inrinni zan atanga tan an awm a. Bial Sunday School Committee kut a nih avangin bial hrang hrangte kalpui dan erawh a dang hret hret hlawm a, bial thenkhatah intihsiak anga kalpui a nih laiin, thenkhatah chuan speaker-te sawma intawhkhawm anga hmangin, kohhran tinten item an nei a, speaker nei lem lova intawhkhawm anga hmang pawh an awm thin bawk.
Kum 1947 khan Sunday School Committee chuan, “Nula leh tlangval Sande Sikul Pawl zirlai hran neih rawtna kha a la ding zel a, zawiin la ngaihtuah se tih a ni,” tiin a rel a. Kum 1954-ah Senior Department hi din a ni ta ni.
Report hnuhnung bera tarlan danin MSSU hnuaia Senior Department-ah zirtirtu 5,136 leh zirtu 31,344, an vaiin 36,480 an awm a ni.