Arsenal in Everton lakah hnehna chang turin an beih viau a ngai a, mahse an tum ber ti hlawhtlingin 1-0 in an chak.
Pathianni zanah Goodison Park-ah Arsenal an inkhel a, Everton khelmual hi tunhnaiah an tana chetthatna hmun a ni ngai lo. Merseyside an pan hnuhnung vawi nga atang vawi li an tlawm.
Tun tumah erawh tunhnaiah Everton an tlakhniam em avangin mualneitu lamin an mikhualte lakah football tha an khel thei lo.
Tun season-ah Toffees hi chak la nei miah lo an ni a, minute 69 chhung an goal fakawm taka an venhim hnuah Arsenal substitute Leandro Trossard chuan goal a khung a. Hnehna an channa goal a ni zui.
Gunners an tlo
Mikel Arteta chuan a goalkeeper rinrawl Aaron Ramsdale chu thlakin David Raya bul a tan tir a. Spanish goalkeeper hian tlarhnung atanga ball lakchhuah kawngah nasa takin team tan awmzia a nei.
First half-ah Gabriel Martinelli hmangin Gunners in goal an khung a, mahse Eddie Nketiah a lo offside avangin VAR hmanga endik hnuah pawm a ni lo.
A pawlten inkhel thunun tha viau mahse a tawp an khar thei lova, Everton in theihtawp chhuahin an dang hram leh thin. Hei vang hian Arsenal manager Mikel Arteta a lawm.
“Helaiah hian hnehna kan chan lohna a rei tawh hle. Kan inkhel a tha hle a, ball hloh leh tihsual kan nei mang lo. Ball kan chang hnem a, goal hlauhawm pawh kan siam tam. Hei aia goal khung hnem tur hi kan ni.” a ti a.
“Tun tum inkhel chu nuam ka ti hle. Manchester United nen kan inkhelh zawh khan ka inen a, ka hmel hahdam lo lutuk kha ka hmu thei. Tunah chuan nuam tihna a hmuh theih thung ang.” tiin a pawlte inkhel a thlirlet.
Chelsea chak hleithei lo
Season bul tan tha tawk lo ve ve an inhmachhawn a, AFC Bournemouth in Chelsea an mikhual a, tun season a Premier League a vawikhatna ni turin goal inpe lovin an inhnehtawk.
Vitality Stadium-ah Cherries lakah hian Chelsea in chance tha zawk an nei a. Nicolas Jackson leh Raheem Sterling ten goal ban an tih per ve ve a. Levi Colwill goal khung chu offside avanga pawm loh a ni bawk.
Second half-ah lakluh thar Cole Palmer chuan Chelsea a chakpui teuh a, mahse Cherries goalkeeper Neto in a team a chhanhim.
Blues boss Mauricio Pochettino chuan, “Zep theih a ni lo, tlarhmaah kan khingpuite goal hmaah kim lo kan nei. Chiai lova, hriam zawk tura kan inbuatsaih a ngai.” tiin an goal khung theih loh chungchang a sawi a. “Chance chu kan insiam tha thei viau a, mahse kan tlarhma a khelte hi inrintawkna an neih theihna tura kan puih a ngai.” a ti.