Norway Prime Minister Erna Solberg chuan kum tam tak liam tawh, khawvel Indopui II-na hun lai daih tawha German sipaiten an ram an laka an ram nulate laka fa an neihna hmeichhiate an tih danah ngaihdam a dil tlaikhawhnu leh.
Norway hi Indopui II-naah khan tan lam nei lo ram (neutral country) a ni a, German sipai, Nazi chuan April, 1940-ah luhchilhin an luah zui a. Sipai tam tak an rama an awm takah chuan Norwegian nula tam tak nen an inkawp a, fanau pawh an nei nual a. Norwegian nula zinga German sipai kawptu, ‘German girls’ an tih hi 50,000 vel lai an awm nia hriat a ni.
German sipaite hi an hotupa, SS leader Heinrich Himmler chuan Norwegian nulate lakah hian fa nei teuh turin a fuih nghe nghe a. Adolf Hitler-a hnuaia sipai thiltithei ber zinga mi, Himmler-a hian Aryan chi (master race) an nih avangin Norwegian nulate hi chi thlahna atan an tha tih a hria a ni.
Hetiang a nih avang hian Norwegian leh German nupa kara piang nau tam tak an awm zui ta a. Hetih lai hian German hian Lebensborn (Fountain of Life) an tih, nau neihna hmun chu kum 1941 khan a din nghe nghe a ni.
Heng Norwegian hmeichhia, German sipai nena lo inkawpte hi ‘German Girls’ an ti zui ta a, Germany a tlawma Indopui II-na a tawp tak hnuah khan Norway ram chuan heng hmeichhiate hi a thinrik zui ta em em thung a ni.
An chungah hremna an lek a, a then chu mihring dikna chanvo bawhpelh tak takin an hrem a, a then manin thenkhat chu an ram atanga hnawt chhuakin an fate nen Germany-a pem tura tirh tak dawr dawr pawh an awm.
Hun a lo kal zel a, tunah erawh Norway ram hi an inhmuchhuak ta a, Nilainia UN-in Universal Declaration of Human Rights a puan kum 70 lawmnaah an PM chuan khatianga an chetna avang khan ngaihdam a dil ta hial a ni.
PM Solberg-i chuan, “Norwegian thuneitute khan fundamental principle kan lo bawhchhia a, dan hnuaiah lo chuan tumah hrem theih a ni lo. Tam tak chu tleirawl ngaihzawngte a ni a, hmelma sipaite nena inhmangaih leh induhna thianghlim kha sual a ni lo va. Vawiinah hian, kan sorkar hmingin khatianga kan ramin a tihnawmnah zawng zawngte lakah khan ngaihdam ka dil a ni,” a ti.