India ram chu mi hausa tawntaw, dollar pawisa anga an neih zat chhiar pawha millionaire tling chinte inpui pakhat a ni ta der mai a. Kum khat (thla 12) liam ta chhung leka millionaire tling pha hi 7,300 zet an awm hman a, India ram chuan millionaire nuai 3.43 zet a kawl ta a. Heng mite hausakna hi $ trillion 6 zet a ni bawk.
Credit Suisse chuan Inia ram hi hmeichhe hausa, billionaire an tam lohna niin a sawi bawk a, hausa tawntaw zinga 18.6% chauh chu hmeichhia an ni.
“Kumin kum laihawl thleng hian, India ramah millionaire 3,43,000 vel an awm a, nikum aiin 7,300 laiin an tam tawh zawk,” tiin Credit Suisse-in 2018 global wealth report a siamah tar lan a ni a. Heng mi hausa zinga 3,400-te hian $ mtd 50 chuang neiin 1,500-te chuan $ mtd 100 vel theuh an nei bawk niin a tar lang.
Kumin kum laihawl thleng khan India mi hausate hausakna hi 2.6%-in nikum aiin a thang niin an tar lang a, a than that loh chhan hi US pawisa laka India pawisa hlutna a tlakhniam vang a ni.
India rama mi hausa an pun zel avang leh an sum neih a tam zel avangin kum 2023-ah chuan India-a sum 53% hi millionaire kuta a awm tawh rin a ni a, hetih hunah hi chuan an zat pawh 5,26,000 vel a nih tawh an ring a, $ trillion 8.8 vel an neih tawh rin a ni.
Report atanga a lan dan chuan khawvel pum hausakna 40% hi hmeichhiate kuta awm a ni a, India ram bikah erawh chuan hmeichhe hausa an tam tehchiam lo thung.
India-ah hian mi hausa tawntaw pung nasa hle mah se a mi nawlpui erawh an hausa lem lo va, “Mihring puitling 91% chu $10,000 nei tling lo an ni,” tiin report-ah hian tar lan a ni.
Kum 2023-ah chuan Indian millionaire-te hausakna hi kum tin 8% zela pungin $ trillion 8.8 an neih tawh rin a ni a. Hausa tawntaw pawh mi 5,26,000 zet awm tawhin 53% laiin an pung tawh dawn niin an ngai bawk.
Vuakvet
US chu mi hausa tawntaw kawl tam ber ram a nih chhunzawm a, kum 10 zet he nihna hi a hauh ta a, kum 2008 atang khan a la hauh ta ngar ngar a ni.
US-a mi hausa tawntawte hausakna hi $ trillion 6.3-in a pung a, $ trillion 98 zet an nei tawh
China chu mi hausa tawntaw kawl tam pahnihna a ni a, an hausakna $ trillion 2.3-a pungin $ trillion 52 an nei tawh
Chinese mi hausate hausakna hi kum 5 lo awm leh tur chhung hian $ trillion 23 velin a pun rin a ni a. Tunah hian khawvel hausakna 16% vel a thawh a, kum 2023-ah chuan 19% chuang a thawh tawh rin a ni
North America ram tih lovah chuan pawisa faia hausakna ni lo, thil neih lama hausakna a pung nasa hle a. China leh Europe-ah pawh hetiang lama hausakna hi 75% zetin a pung a, India-ah pawh sum fai ni lovin, thil neih lamah mi hausate an inchhek nasa hle a ni