Aizawl : MPCC thupuangtu Dr Lallianchhunga chuan sum leh pai hmachhuana politics khel thinte hnawl an nih loh chuan Mizoram hi hausa te chauh rorelna ramah a chang thuai thei niin a sawi.
Champhai South bial chhung, Zotlang Congress Unit huaihawtin Zotlang kawngah Inrinni khan Street campaign neih a ni. He hun hmanpuitu, Champhai South biala Indian National Congress (INC) atanga ding tur Dr Lallianchhunga hian, politcs khelh danah Lal Isua zirtirna kalhin sum leh pai a langsar lutuk tawh tih a sawi a. “Champhai district chhunga Assembly bial pathumte hi mi hausa te chauh din ngamna bialah tute emaw hian an siam ang tih a hlauhawm avangin, mipuite kan fimkhur a ngai,” a ti.
Sum leh pai hmachhuana politics khel thinte hi mipuiin an hnawl ngam a ngai tih sawiin Dr Lallianchhunga chuan, “Heng mite hi kan hnawl tih kan lan tir thuai loh chuan Mizoram hi mi hausa te chauh rorelna ramah a chang thuai thei a ni,” a ti bawk.
Dr Lallianchhunga chuan, Mizoram political party zingah central BJP thawhpui mektu leh BJP sum leh pai beisitu an awm leh thin chu Mizo hnam tan a la pawi dawn hle tih a sawi a. BJP phenah hian India ram Hindu lalram a siam tumtu ten thiam takin Kristian leh sakhaw te zawk te an nekchep mek a. Mizo pa ngeiin a din political party zingah central BJP thawhpui theih party an awm hi Kristian pa thlirna atang a dik thei lo a. “Kristian te nekchepnaah hian mawh an phur ngam dawn em? Mizoram a political party zingah India ram hi Hindu lal ram a siam tum mek tu Central BJP thawh pui lo tur chiang sa chu Congress party chiah hi a ni,” a ti bawk.
Street Campaign hi Zotlang MPF Local Forum atangin Upa Ralkapzauva’n a kaihruai a ni.