Aizawl: MNF thalaiin Zoram zalenna suala nunna hlantu, hnam pasalthate hriatrengna ‘Martar Day’ vawi 42-na lo thleng tur pualin vawiinah Aizawlah Two wheeler hmangin ‘Mizo Nationalism Rally’ an buatsaih dawn.
MNF thalai hruaitute chuan Mizo Nationalism Rally an buatsaih tur chungchang puangin nimin khan Aizawl Press Club-ah chanchinbu mite an kawm a, an Vice President Zodinpuia’n a sawi danin, Mizo Nationalism Rally hi chhun dar 12-ah AMC Office bul, Thuampui veng atangin MNYF President Dr. L Thangmawia, MLA chuan a flag off ang a, hun kharna inkhawm hi chawhnu dar 2-ah Vanapa Hall-kawt a neih tur a ni a, Deputy Chief Minister Tawnluia hovin hun an hmang ang a, Mizoramin zalenna a sual laia hnam puanzar pho lan a ni dawn a ni.
MNF thalai Vice President Zodinpuia chuan Mizo thalaite zingah hnam hmangaihna rilru nasa taka a indinthar chho leh ta chu lawmawm an tih thute, Mizote hnam dang lak atanga chim rala a awm mai lohna tur leh, hnam anga kan dam khawchhuah theihna turin hnam hmangaihna thinlung nei tura nsa taka inzirtir chhoh zel a tul thu a sawi a ni.
Zodinpuia chuan politics khawvelah pawh thalaiten ram leh hnam tana nunna hlan huam a lo pen chhuak tawhte an chawimawi a, an ngaihhlut lehzual a ngai tih sawiin, “Kan hnam pasaltha (freedom fighter)-ten ram leh hnam tana sulhnu min hnutchhiahte hi keinin kan chawisan loh chuan hnamdangin min chawisansak ngai dawn lo tih hriain, Zoram zalenna tura penchhuakte i chawimawi thar zel ang u,” a ti bawk.