MNF Adviser Robert Romawia Royte chuan ZPM party mi leh sate chu thianghlim famkima inngai, mi dangte bawlhhlawh leh thil tha engmah ti lo anga diriam thinah a puh.
Nimina MNF party in an office Hnam Runa chhung inkhawm an neihah Robert Romawia Royte chuan ZPM chungchang hi sawiin, “ZPM an nihna chu ‘thianghlim famkim nihna’ emaw tiin ZPM ni ve lo chu an rawngbawlpuite thlengin bawlhhlawh leh thil tha engmah ti lo ang maiin an diriam fo,” a ti a, tha famkim angin in chhal mah se an thiltihah an nihna a lang tih a sawi.
Robert-a chuan, mipuiin ZPM chungchanga thudik an hrechiang ta tiin, unit an din dawn loh thu sawi mah se a theihna apiangah zak miah lovin an din a, MLA hlawh sang lak ve loh an sawi laiin a la hmasatute an nih thu a sawi a, “MLA car man tur sum kan dawng ve dawn lo, designation plate tar ve loh tur an ti em kha? A titute hi MLA Car leina atana a sum la hmasa leh MLA designation plate pawh a tar fiah fiah an ni,” a ti.
ZPM rorelna – Lunglei Municipal Council (LMC)-ah pawh an hnathawh awm chhun chu car thar lei bawk a nih thu a sawi a, Lunglei mipuiin an thlang sual tih an hre tan mek niin a sawi a; an leader chu political party pakuaa zuang lawra fail vek tawh leh a party 10-naah pawh a fail leh mek tih a sawi.
Congress party chungchang pawh sawi telin, an hun a liam tawh thute, thenawm state-ah an tlachhe vek tawh a, Mizoramah pawh an hmalam hun a thim tihte, a fing apiangin an chhuahsan mek tih a sawi.
Robert-a chuan an party-in MLA inthlanpui neih turah candidate an nei tha a, mipui khawngaihna an chan leh ngei a rin thu a sawi a, ECI-in inthlan han puang sela; mahni dinna tur bial zelah party tin candidate-te han lut sang sang ila MNF danglamna chu a lo lang chiang lehzual ngei ang, a ti bawk.