Aizawl: Chief Minister Zoramthanga’n Mizoram chu remna leh muanna entirtu ram, state entawn tlaka awmtir zel turin police-ten hna an thawh a ngai tih a sawi.
He thu hi nimina Mizoram Police Sports Meet vawi 21-na a hawnnaah a sawi a, chief minister chuan, “Kan thenawm ramteah buaina a awm avangin mi tam tak an rawn raltlan tih kan hria a, ram ralmuang tak kan nih hlutzia hi hrerengin Mizoram hi remna leh muanna entirtu ram, state entawn tlaka awmtir zel turin i thawk ang u,” a ti.
Zorama chuan, ralthuam tawlh rukna te, drugs tawlh rukna te leh smuggling chi hrang hrangin Mizoram a chim thu sawiin, heng thil tha lo che vel te laka huaisen taka an hmalaknaah police te chu fak a. Police te chu ruihhlo laka fihlim a, he thil tha lo hnehtu nih tum tura a fuih bakah police-te chu rilru leh taksa hrisel nei reng tura ngaih an nih thu a sawi bawk.
Director General of Police (DGP) Anil Shukla pawhin thu sawi bawkin, Mizoram police ten sports huangah India ram huapin hlawhtlinna an lo chang fo tawh tih sawiin, tunhnaia India ram state police zawng zawng inelna 71st. BN Mullick Memorial Football Championship, Srinagar, J&K a buatsaihah pawh Mizoram Police chu an champion tih a sawi a. Police ten tha taka an hna an thawh theih nan rilru leh taksa hrisel an neih a tul avangin Sports hi Police te thuamthatna pawimawh tak pakhat a nih thu a sawi bawk a ni.
Mizoram Police Sports Meet-ah hian Police te chu contingent 12 ah inthen darhin discipline 18 ah inelna an nei dawn a, police infiammi 1107 an ten intihsiakna an nei dawn a ni. Tun thla ni 22 thleng a awh ang.
Mizoram Police Sports Meet hi kum 1987 atang khan rokhawlhna a awm loh chuan kum tin buatsaih thin a ni a, kumin hi a tum 21 a ni.