Aizawl: Kumin MLA inthlan lo awm tura Tuikum biala independent-a chuh tum, C Lalrinmawii, Chhiahtlang chuan nimin khan Aizawl Press Club-ah thuthar thehdarhtute a kawm a, in-candidate a tum chhante a sawifiah.
C Lalrinmawii chuan kum 2021 August thlaa village council inthlanah khan independent-in Chhiahtlang South atangin thlan tlin a nih thu te, VC member ni chungin theihtawp chhuah mah se party induhsaknate a nasat avangin khawtlang tana theihtawp chhuah a tumnaah a duh anga hmalak harsa a tih thu te sawiin, “Hemi avang hian unit chungah awm a, MLA nih ka ngai tih rilruah a lian hle a, Pathian rawn chungin Tuikum bial mipui tana theih tawp chhuah turin independent-in din ka tum ta a ni,” a ti.
Hmeichhiate hian tih theih tam tak an nei a ni tih lantir a tum thu sawiin, Tuikum bial mipuite chu an bial chhung mi ngei MLA atana thlang turin a sawm tih a sawi.
C Lalrinmawii chuan MLA a nih huna Tuikum bial tana hmalak a tum hrang hrangte sawi bawkin, lo neitute mamawh tak link road tha siam a tum thu te, hna nei loten eizawnna ngelnghet an neih theihna tura hmalakpui a tum thu te, zirna hmasawnna atana hmalak a tum thu bakah a manifesto a neih hrang hrangte a sawi.
MLA fund chu mipui sum a nih angin langtlang taka hman a tum thu sawiin, MLA fund bakah central scheme hrang hrangte hman tangkai a tum thu a sawi bawk a ni.