Zaithiam lar te’n an music rights an hralh chhoh mek karah Katy Perry pawhin Litmus Music kutah a music rights a hralh nia sawi niin, $Maktaduai 225 lawih a ni.
He indawrnaah Katy Perry0’n kum 2008-2020 inkara a tihchhuah album panga- ‘One of the Boys,’ ‘Teenage Dream’, ‘Prism,’ ‘Witness,’ leh ‘Smile’ album master recording leh publishing right zawng zawng a huam tel. Chutih rualin, Universal Music Group hian heng album master neitu nihna erawh a nei chhunzawm ang.
Katy hian 2008 atang khan rimawi khawvel nasa taka barakhaihin, hming a chher chiang hle. Tunah erawh Las Vegas-ah a pasal Orlando Bloom nena chhungkua din tawhin, rimawi lamah a inhmang meuh tawh lova, American Idol judge a nih bak thil lian tham leh langsarah a hmel hmuh tur a awm lem lo.
Hetih lai hian, Litmus Music hi 2022 nipui laia indin chho chauh ni mah se, an thawm thang vel a ring a, an che na chho viau dawn niin a lang. Nikum December khan Ketih Urban-a music rights an lo leisak tawh a, zaithiam lar dangte nen pawh inbiakna an nei chho mek nia sawi a ni bawk.
Litmus dintute zingami leh CEO ni bawk Hank Forsyth chuan, “Katy hla te hi rimawi khawvel al hnehtute zinga langsar a tling pha. A thil tihna reng renga eng pechhuak thei leh huhang ngah em em nena kan thawkho thei hi kan lawm takzet a ni,” a ti.