Kolasib bialtu MLA, Minister ni bawk K. Lalrinliana’n nimin khan a bial chhungah Family Oriented SEDP Phase 2 beneficiary assembly & re-orientation programme a hmanpui.
K. Lalrinliana chu- an a bial chhunga kh- aw pali – Bairabi, Meidum, Pangbalkawn leh South Chhimluanga ah te Family Oriented Socio-Economic Development Programme (SEDP) Phase 2-a ṭanpuina dawng tur te thil pawimawh hrilhfiahna hun chu a hmanpui a. Mizoram ei leh bar leh sum leh pai dinhmun (economy)-in hma a sawn nia sawiin, “kan intodelh theih nan leh eizawnna ngelnghet nei lo ten eizawnna ngelghet an lo neih theih nan SEDP chu sorkarin a ruahman a ni” a ti.
Hun hmasa lamah ram hmasawnna ruhrel atana pawimawh – inkalpawhna kawng ṭha, tui thianghlim in tur hnianghnar leh kawlphetha ṭha leh hnianghnar nei tura hmalak nan leh line department hnuaia hma- lakna tur ruahmanna atan te sum dah a nih thu K Lalrinliana chuan sawiin, hengah hian hmalak hmasak a nih thu a sawi a. COVID-19 hri leng avang leh lirnghing, ramri buai leh raltlan boruak avang te in ruahman lawklohnaa sum hmanna tur tam tak awm avangin engemawchen SEDP pawh kalpui chhunzawm theih a nih loh hnuah mimal leh chhung- kuain eizawnna ngelnghet an neiha, an intodelh theih nan Family Oriented SEDP (FOSEDP) hnuaiah hma lak chhunzawm a ni leh thei ta chu lawmawm a tih thu a sawi.
FOSEDP Phase 1 kalpui mekah beneficiary 60,000 hnenah ṭanpuina instalment 2 pek tawh niin, instalment dang pawh la pek chhunzawm zel tum a nih thu a sawi a,. Tunah beneficiary 60,000 bawk tinzawnin Phase 2 bulṭan leh mek niin, pawisa pawh beneficiary-te account-ah thun ṭan a nih tawh thu K Lalrinliana chuan a sawi.
Phase 3 pawh a tahtawla chhunzawm zel tura ruahman a nih thu K Lalrinliana chuan sawiin, Governing Board leh Executive Board ten an pawm tawh tih a sawi a. Ṭanpuina chu la sem chhunzawm zel tur niin, cheng nuai thum thleng pek tum a nih thu a sawi.
Minister K. Lalrinliana chuan SEDP chu hlawhtlinpui theih a ni tih hriaa, an hmalakna puitling ngei tura theihtawp chhuah tur leh tu leh fa te tan pawha chhenfakawm leh chhunzawm zel tlaka hma la turin beneficiary-te chu a chah a. Trade thlanah fimkhur a ngaih thu te, ran vulh leh hmalakna dangah insurance tih nachang hriat a pawimawh thu te sawiin, mahni zawh tawka bulṭan a, hma zauh zel turin beneficiary-te chu a chah a ni.