Mizo National Youth Front Hqrs chuan nimin khan Martarte Ni pualin Aizawlah Two Wheeler Rally an buatsaih a, Thuampui AMC Building atanga tlan chhuak tanin Vanapa Hall-ah a kharna neih a ni.
Kharna hunah hian Deputy Chief Minister Tawnluia chuan Martarte chu zahna chibai a buk a. Hnam Martarte chu Mizo hnamin zalenna a neiha awp behna atanga zalenna an hmuh theihna atana bei tu an nih thu sawiin, “I tan leh ka tana an nunna hlu tak hlantute kha an ni a, thalaite hian hlutin i chawimawi ang u,” a ti.
Tawnluia chuan hnam Martarten ram leh hnam an hmangaih avanga mahni inphatsana an nunna hlu tak an hlan ang hian ram leh hnam chhan turin thalaiten an rilru an sawh nghet deuh deuh a tul tih a sawi a. Remna chungchang sawiin, “MNF chu an in-surrender lo a, Zoram mipuite duh dan ang zawkin remna chu kan siam ta a ni,” a ti a; a ni lo zawnga sawi thinte hian bânsan tawh se a duh thu a sawi bawk.
Kharna hun hi MNF thalai Vice President Zodinpuia’n a kaihruai a, H. Lalroliana, Treasurer, MNYF Hqrs chuan lawmthu a sawi a ni.