- Lalsawma, JD(F&DA)
Directorate of Health Services
“Mum khatin – ni tin vawi thum – ni nga chhung” !!
Eng emaw avangin kan awm a nuam lo va, khua a sik a, pum a na a, kua a tha lo va, chutih hunah chuan chang dang kan a hun tawh lo. Daktawr r^wn tura kal, in entir mai a finthlak ber. Daktawr chu kan rawn ta ngei a, anin uluk tak leh dilchhut takin kan awmdan min lo zawt a, mar a dek a, lungphute ngaithlain a thiamna zawng zawng sawmkhawmin kan damloh chhan a zawng thin a. He hun hi damlo ten fiah tak leh kim taka kan awmdan kan sawichhuah hun a ni, zahzum a hun lo va, zep then pawh a hun hek lo. He huna daktawr-in a thil hriat leh a hmuhchhuah hian kan natna tihdamna turin kawngro a su thui hle tih hriat tur a ni.
Kan awmdan kan sawi atangin thisen, zun, ek exam a ngai mai thei a, khawl changkang zawka zirchian pawh a ngai mai thei. Heng zawng zawng ngaihtuah chhuak tur chuan damlo ten kan nat dan fiah fai leh kim taka kan sawichhuah a ngai thin. Chutia kan nat dan chipchiar taka kan sawi vek hnu chuan daktawrin damdawi min chawh ta thin a, chu damdawi min chawh-na lehkha chu Prescription an ti.
He Prescription hi eng nge a nih a? Engtianga tangkai leh awmze nei nge a nih? tih sawifiah kan tum dawn nia.
Eng nge Prescription chu : Prescription hi daktawr in, damlo pakhat tan, ama tan chauh, ziaka in enkawl dan tur, damdawi a ei dan tur, “Order,” a pek a ni. Mi dangin lo ziah belh emaw lo tih danglam emaw a thiang lo.Thupek a nih angin a ziaktu daktawr hian a thu ziahah hian mawhphurhna a nei a, thil a lo tisual palh a, damlo dik lo taka damdawi a chawh a nih phei chuan a tuar thei a ni. Chu mai lovah, tihsual palh a lo awm a nih pawhin amah chauhvin a siam tha leh thiang a, damdawi ziak pawh a thlak leh thei, mi dang lo inrawlh ve a thiang lo.
Prescription-ah chuan engte nge awm tur? : Prescription chu daktawr order a ni kan tih tawh angin, a chhunga ziah dan tur, ziah lan ngei ngei tur thil tam tak a awm a, chungte chuan pawimawhna thuk tak an nei vek, zawm kim loh te, a hun bawh pelh te, a ei zat tur ei loh ten pawi nasa tak a khawih thei a, dam aiin harsatna dan a paw chhuak thei a ni.
Prescription-ah chuan damlo hming, kum leh sex (hmeichhia/mipa) an ziak hmasa ber tur a ni a, chumi dawtah chuan damlo awmdan leh a lo exam dante chhinchhiah ngai a tih daktawr in a chhinchhiah leh ang. Chumi dawt leh a mi chu thil lamtawi, “Rx” tih a ni, hei hi latin tawnga “Recipe” (Risipi) tih a ni a, Sap tawng chuan, ‘take thou’ tihna a ni a, Mizo tawng chuan ‘ei rawh ’ tih te pawhin a dah theih awm e. He symbol Rx hnuaiah hian damdawi chawh a in ziak tlar leh a, hei pawh hi ziah tlar satliah a ni lo, awmze nei a ziah a ni. Damdawi hming, a ei dan tur, ei hun chhung leh dmdawi chak zawngte kim takin a in ziak vek tur a ni.
Hemi hnuai lehah damlo ten an chin thin, an damloh avanga an insum ngai emaw, an chin ngai loh an tih thar tur thur^wn ziah lehna tur a ni a, ennawn ngai tur chi a nih pawh a, a kal leh hun tur, tih tur leh tih loh tur ziakna hmun a awm leh bawk. Chumi dawta mi chu, daktawr hming ziak signature a ni a, hetah hian a thiamna hrang hrang a dah thei a, a pawimawh ber erawh chu daktawr a nih theihna, a registration number a tel ngei tur a ni. Hei hian a Prescription kha thil ti thei leh Court-ah pawh thu tlingah a chantir.
Prescription mai mai han ziah kur nguai chu? tiin kan rilruah zawhna a lo piang a ni mai thei, piang pawh nise mak lo. Amaherawhchu, Mizoram mipui ten damdawi kan basa ngam lutuk avanga harsatna tam tak, Drugs Addict lo pianna, O. D. a thihna, damdawi eisual avanga harsatna te, Antibiotics tam tak laka natna hrik ten resistance an lo neih tak avanga harsatna tam tak kan tawh mekte hi Prescription awmzia kan hriat loh vangte, kan ngaih pawimawh tawk loh vangte a lo awm niin a hriat a.
Tunlai ngat phei chuan thil hlauhawm tak mai Vancomycin R esistance Staplylocoecus A ureaus (VRSA) an tih te hi India ramah awm tawha hriat a ni a, hetiang dinhmunah hian kan ding tak tak a nih chuan khawihli satliah leh pin satliah atangin dam thei lovin kan awm dawn tihna a ni a, hengte hi a thlen loh nan mitin damdawi hman dan a fimkhur tura in chah pahin, kan lo hrisel zawk nan mi zawng zawng kan in sawm a ni.
Kan thupui a mi ang khian, daktawrin mum khatin, ni tin vawi thum, – ni nga chhung a ti a nih chuan, a ziak ang a ei mai hi a him ber. Ni tin vawi thum – han tih mai pawh hi dilchhut a ngai, mahni remchan hun hun a vawi thum eitur tihna lam a ni lo. Darkar riat danah eitur tihna a ni.
Kan damdawi ei khan darkar riat chhung kan taksaah hna a th awk a, darkar riat hnuah chuan mum dang ei a ngai tih hriat tur. Chutiang bawkin, ninga ei mai tur, a aia tlem emaw reilo emaw kan ei khan natna hrik a ti thi zo lo va, a ti chau chauh tihah kan tawp san chuan Resistance Strain Bacteria kan siam chhuak tihna lek a ni dawn. Chuvangin, mi tinte i fimkhur theuh ang u.