Social Welfare Minister Er Lalrinawma’n Mizote kût zinga mi, ‘Mim Kût’ chu September 29, 2023-ah hman a ni dawn tih sawiin, hemi ni hian chhung tinte chu an hmangaih kal tate puala hun hmang turin a sawm.
Sorkar ruahmana Mim Kût hman tur chungchangah hian social welfare minister chuan nimin khan a pisaa chanchinbu mite a kawm a, hemi ni hian chhung tinte chu an hmangaih kal tate puala chawhlui kila thlan tifai tura sawmin, mipuite chu thlan ram tawh chei that leh mi dang harsa zawkte tan luanchhuaha malsawmna ni anga hmang turin a ngen.
Er Lalrinawma chuan Social Welfare & Tribal Affairs Department ruahmannain ‘Mim Kût’ pualin September 29-ah Vana Pa Hall-ah hun hman a ni dawn tih te, ‘Mim Kût’ hman tan dan leh hman a lo nih tawh dante lemchan leh thil dang hmangin tar lan a ni dawn tih a sawi.
Social Welfare-in a sawi danin, ‘Mim Kût’ hmanna tur atan hian Ministry of Tribal Affairs, Govt. of India-ah DPR siamin sum mamawhte thlen a ni a, sorkar laipui hian kût hmanna tan hian Rs 20,00,000 a pe a ni.
Zawhna chhangin Er Lalrinawma chuan ‘Mim Kût’ chu kum tin hman tawh tura ruahman a nih thu sawiin, September thlaa chawlhkar tawp berah hman thin nise tih a nih thu a sawi.
Mim Kût hman tur pual hian ‘Mim Kût Logo’ competition buatsaih a ni a, ‘Mim Kût Logo’ atan Jonathan Zorinpuia, Mizoram House, Vasant Vihar, New Delhi ziah chu thlan a ni.