Tata SK 612 LPS Pro Fight-ah vawi ruk champion hmasa ber nih tumin NT Lalbiakkima a tel dawn a, tute pawh a hmaah ding dawn se harsatna a nei lo.
Kum 27 mi Biakkima hian hming pek theih ni hnuhnung ber Nilainiah lehkha a theh lut dawn a, flyweight kg 48 atanga kg 52 inkarah champion kawnghren la kir turin a tel dawn tih a sawi nawn leh.
Flyweight champion lai Laldinsanga’n application form a theh lut tawh a, nikum khan Pro Fight title a lak hnuah weight rit zawk bantamweight-ah a khel zui a, chutihlaiin Mizo boxer langsar leh thawm nei lian tak Biakkima nena intawn theih a duh hle a, a tan tawnhriat pawimawh tak a ni dawn tih a sawi.
2014 khan kum 18 mi niin a vawi khat nan Pro Fight-ah New Siaha boxer Biakkima a tel a, lightflyweight-ah champion-in 2019 thlengin vawi nga a champion zawn a, nikumah awlin kuminah tha tharin a kir leh dawn a, a vanglai a hmang tan chauh tih a sawi.
Tunlai Mizo boxer chhuak thar zinga tha ber pawl leh 2022 best boxer, kum 20 mi Dinsanga nena intawng dawn pawh ni se harsatna a neih loh thu a sawi a, Pro Fight chanchina vawi ruk champion hmasa ber nih tumin a inpuahchah ngawrh hle
Zo Keite chuan, “Dinsanga hi a la naupang a, ani nena intawng turin eng harsatna mah ka nei lo. Amah pumpelh tum ang zawngin rilru ka pu lo hrim hrim,” a ti.
2009 atangin Pro Fight kalpui a ni a, weight hrang hrangah boxer hrang 23 an champion tawh a, Biakkima leh Tuipui chhuanvawr HC Johnkenty Vanhlimpuia’n tum nga title la tawhin an bitum apiang an la hneh vek a, champion ngun ber an ni dun mek.
Tata SK 612 LPS Pro Fight-ah Indian Navy boxer Vana’n tel a tum lo va, mahse title fight rualin professional boxing a luhchilh theihna kawng hawnsak a ni ang.
Chutih laiin Biakkima’n champion kawnghren hren leh ngei a tumna a tihlawhtling a nih chuan Vana nena hnuhma inang an neih kalsanin mi malin champion hnem ber a ni dawn a ni.
Pro Fight-a tel tur tan nilaini thleng hming pek theih a ni a, Thawhlehni tlai thlengin boxer 370 chuangin lehkha an theh lut tawh.