- Ruata
Triumph chuan an bike lar leh mawi, chak bawk si Street Triple chu dealer hrang hrangah an pechhuak tan dawn tih an puang ta a, an bike hi 2023 model thar niin Street Triple R leh RS te a awm dawn a ni.
Heng bike model pahnihte hi kumin June thla khan an lo tlangzarh tawh a. Street Triple R hi hi cheng nuai 10.17 man tur a ni a, Street Triple RS hi cheng nuai 11.81 man tur a ni bawk a. Harsatna hrang hrang avangin an tlangzarh hnu hian lei theih turin an pechhuak lawk thei lo a, tunah chuan an hralhchhuak thei ta tih an puang a. 2023 Street Triple zawk hi a hma aiin cheng nuai 1 velin a to zawk dawn a, RS zawk hi a hma aiin Rs. 50,000 bawrin a to zawk thung dawn a ni.
April thlaa Bajaj in Triumph bike ho hralhchhuah leh service theihna an kuta an lak hnua Triumph bike lian ho an hralhchhuah hmasak ber tur a ni dawn a. Tuna an bike man tlawm Speed 400 lo chhuak hian Triumph hi India ramah market lamah pawh a puih viau beisei a ni a. Tun tangka kum (financial year) chhung hian India ram pumah showroom 120 vel atanga hralhchhuak thei turin ruahmanna an siam a, zau taka hmalak an tum bakah India ramah he British bike changkang leh rintlak hi a tam thei ang ber hralhchhuah an tum a ni a. India ram two wheeler market-ah pawh nghawng tha tak a neih a beiseiawm a ni.
Street Triple khawl te hi Moto2 world championship atanga company in an zirchhuah hmangin tha lehzuala duan a ni a. Kawng hrang hrangah a hmaa lo chhuak thin te aia tha lehzualin an duang a ni. Heng an hmasawnna zingah hian piston thar, con rod thar, intake tawi zawk, camshaft thar leh valve lift tihsan hret te a tel a. An khawl hman tir hi liquid cooled 765cc 3 cylinder khawl niin hei hian an duan thar thil hrang hrang a hman hnu hian R zawk hian 120hp power a pechhuak thei a, RS hian 130hp power a pechhuak thei dawn bawk a ni. A torque lam chu model pahnihah hian 80Nm a la ni ve ve thung a ni.
Triumph hian a bike chassis pawh ennawnin a wheelbase an ti tawi hret bawk a. Race track mil tur zawk RS-ah hian a sub frame chu an ti sang hret a, a monoshock-a 20mm spacer an dah hmangin hei hi an ti thei a ni. A hmain Triumph Street Triple R hian Pirelli Diablo Rosso III tyre a hmang thin a, hei pawh hi Continental ContiRoad tyre in an thlak a. RS hian Pirelli Diablo Supercorsa SP V3 tyre ban leh nghet zawk a rawn hmang tawh bawk a ni. Triple R hian a hmaa a hma ang bawk Brembo M4.32 monobloc caliper a hmang a, RS braking software erawh chu Brembo Stylema unit upgrade thar hmanga thlak a ni thung a ni.
Triumph Street Triple hi bike lian leh changkang, man to lam hret a ni a. Hetihrual hian Mizoramah ngei pawh lirthei kan hmu man to sawt khawp mai a. Triumph bike pawh hi a awm nual tawh avangin he bike cheng nuai 10 man bawr vel hi chu kan hmu leh neuh neuh a beiseiawm a. Triumph bike lian ho ngaina tan leh bike man to leh lian ho ngainatute chuan an neih leh thuai ngei ang a, tuna a thar tha zawk leh chak tha zawk a lo chhuak hi helam tuipuitute tan chuan thu lawmawm tak a ni awm e.