Aizawl: Zoram Drivers’ Union, Bilkhawthlir Unit chuan nimin khan Bilkhawthlir Kharzawla kawng khuar chhe nasa lirthei tlan tana chetsual hlauhawm lai chu hnatlang neiin an siam tha.
Thudawn danin, Bilkhawthlir Kharzawl a kawng chhia hi a khuar thuk in, a hma pawhin truck a lo let tawh a. Heivang hian ZDU Bilkhawthlir Unit chuan hnatlang kovin kawng siam hna hi an thawk ta a ni.
Helai kawng hi Ratna Company enkawl lai niin, ZDU hruaitute hian Ratna lam hi an be hmasa tawh a, tui paihna a awm loh avangin helai kawng hi siam thin mahse, a chhiat leh zel avangin siam that hleih theih a nih loh thu in an lo chhang a ni.
ZDU hruaitute hian lung an ngaihtuah theih chuan hnatlanga an siam theih thu an sawi angin, Ratna lam hian lung hi a hmun ah dahin ZDU lam hian hnatlangin a siam hna hi an thawk a, mahse nimin khan lung hi trip khat chiah dahin vawiinah lam hian trip 10 an dah leh dawn a, hnatlang neiin ZDU lam hian kawng siam hi chhunzawm an tum niin thu dawn a ni.