Aizawl : Nimin khan Aizawl S-II Block Congress Committtee Worker’s Meet chu ITI YMA Hall-ah hman a ni. He huna thusawitu Dr Lalmalsawma Nghaka, Treasurer MPCC chuan Aizawl S-II Block Congress Committee Worker’s meet a hmanpui naah thusawiin, “Kan ramin vawiinah hian eng nge a mamawh ber ti ila, Pathian hruai theih hruaitu kan mamawh a ni. Congress-in Pathian hruai theih hruaitu Pu Lalsawta kan nei a ni,” a ti.
Dr Lalmalsawma Nghaka, Treasurer MPCC chuan kan ramah Ruihhlo a hluar em em a, Ruihhlo tawlhna kawngpui kan ni mek a. Kan sawrkar sum harsatna avangin sumdawngten an tuar mek bawk a, kan ram kawngpui te a chhiat avangin Transporter te pawhin rawn kal an hreh em em a, kan ram dinhmun hi a chhe hle a ni. BJP in kan thenawm State te an la mek a, keini hi an hmabak kan nih avangin Congress sawrkar kan din a ngai a ni, a ti a.
Kan party hi Pathian hruai theih kan nih a ngai a, kan tu leh fate awmna tlaka kan siam a ngai a ni. Tuna kan kalphung angah hi chuan kan tu leh fate chan tur ngaihtuah ngam a ni lova, kan harh a ngai a ni a ti bawk a. BJP thiltum te a hlawhtlin loh nana hma la thei awmchhun Party chu Congress chauh hi a ni a, Mizoram mipuite innghahna kan ni mek a. Pathian hnenah kan tawngtai ang a, kan ram mipuite rawngbawl turin Pathianin min chhawp chhuak ngei ang, a ti a.
Mi tam takin dinhmun chhe zawkte chawikanna hmalakna te an sawisel thin. Mi tamtak tanpui mamawh ngawih ngawihte tanpui hi Congress sawrkar in a ngai pawimawh hle zawk a ni. Congress party ngaihpawimawh chu mipuite an ni a, chuvangin Referal Hospital-te kan din a, Medical College te kan din a ni. Chuvangin Congress Party-in sawrkarna a chan leh theih nan worker ten theihtawp kan chhuah a ngaih thu a sawi bawk.
Thusawitu dang Lt. Col ZS Zuala Ex- MLA pawhin thu sawiin Congress Worker-te fuihna thu tha tak a sawi a. Congress sawrkar laia Aizawl S-II chhunga hna an thawhte kha Worker te hnathawh vek a ni tih a sawi a, Candidate atan mi tha, bial mipuite duh rawn kan nei hi kan vannei a, kan hlawhtlin ngei theih nan tan kan lak a ngai a ni tih a sawi a ni.
Central-a BJP kaihhruai sawrkar hi keini Kristiante tan an hlauhawm em em a, Manipur-a Zohnahthlakte anga kan tawrh ve loh nan, kan tu leh fate tan he inthlanah hian kan chak a ngaih thu a sawi.
Lalremruata Renthlei, Chairman, Media Dept chuan ‘Tang Puihna’ sawifiahna hun a hmang bawk a, kalkhawm ten hlawkthlak an ti hle a. Pu Vanlalhruaia ADCC Vice President pawhin thu a sawi bawk. Dr. Lalmalsawma Nghaka, Treasurer MPCC leh Aizawl S-II Congress Party Candidate tur ni bawk hi Party hruaituten an tawiawm tha hle a ni.