Delhi chief minister Arvind Kejriwal chu nimin chawhnua chhunchaw ei tura a pisaa a chhuahin amah lo nghaktu mi pakhatin a hmaiah hmarcha dip (chilli powder) hmangin a hmaiah a vawm a. A tarmit a chhia a, a taksa dang erawh a him. He thil thleng avang hian an party, Aam Aadmi Party chuan Delhi police-te venhimna lama an hlawhchhamzia leh chief minister nunna atana hlauhthawnawm thil pawh thleng thei a nih thu an aupui nasa hle.
Chief minister Kejriwal hian Delhi Secretariat-a chawhnu 2:l0 leh 2:15 inkar vela a pisa a chhuahsan chu amah lo nghaktu, Anil Kumar Sharma hian chibai tum ni awm taka panin a hmaiah hmarcha dip hian a theh ta a ni.
Sharma hi Naraina venga cheng a ni a, man nghal a ni a, police-in an hreng mek.
He thil thleng chungchangah hian AAP thupuangtu, Raghav Chadha chuan, “CM hi a tarmit pawh chhuatah tlain a keh a, venhimna hlawhchham dan hi ngaihhnathiam theih a ni lo. A beitu khan hriamhrei hlauhawm zawk lo keng ni sela, tunge tun aia chhiatna lian zawk hi a thleng lo vang tih sawi thei awm?” tiin chief minister a him loh theihzia a sawi.
AAP hian Twitter lamah pawh, “Delhi Police venhimna a hlawhchham a, Chief Minister hi Delhi-ah a him lo,” an ti a. A beitu hian vengtu eng emaw zat kalpelin chief minister pindan bul a thleng thei a, tumahin a thil pai hi an hmu lo chu thil mak a nih thu an sawi bawk.
AAP MLA Saurabh Bharadwaj leh Raghav Chadha chuan thuthar lakhawmtute kawmin hetiang thil a thlen chhan hi sorkar laipuia rporel lai, BJP vang a nih thu an sawi a. Bharadwaj chuan, “BJP hian mite thinlungah chief minister huatna an tuh a, bei pawh ni sela sorkar laipuiin a hum tlat dawn tih an inhria a ni,” a ti.
Chadha pawhin thil thleng zawng zawng a hmu vek tih a sawi a, a beitu hmanrua chu tumahin an chhuhsak lo chu mak a tih thu a sawi a, police-in an chhui dawn a nih chuan a thil hriat ang hrilh turin a inpeih reng tih a sawi.