Aizawl: Tun hnai kum li leh thla ruk chhungin Mizoramah ngawr natna, Tuberculosis (TB) vanga thi mi 314 an awm.
National TB Elimination Programme chuan nimin khan Aizawl Press Club-ah journalist te pualin TB chungchang inhrilhriatna hun an buatsaih a, he huna an tarlan danin, kum 2019 atanga kumin June thla thleng, thla 54 chhungin Mizoramah TB vei mi 10,075 an awm a, hemi hun chhung hian TB vangin mi 314 an thi.
Tunhnai kum li, 2019-2022 chhunga TB vei hmuh chhuah tam ber kum chu 2019 kha niin, TB vei 2,980 an awm a, TB vanga nunna chân tam ber kum chu nikum 2022 kha niin, mi 74 an boral a ni.
Kumin bikah January atanga June thla chhungin TB vei rinhlelh mi 6,783 endikah TB vei hmuh chhuah mi 1,144 an awm a, chung zinga 81-te chu TB pangai aia tihdam harsa Multi drug resistant (MDR-TB) vei an ni a, kumin thla 6 chhunga TB hmuh chhuah tawh zawng zawng atanga za zela 83 chu enkawl dam an ni tawh.
National TB Elimination Programme hotute chuan kuminah TB vanga thi an tam thu an tarlang a, thla ruk chhungin mi 62 boral tawhin, nikum 2022 kumtluana TB vanga boral mi 74 awm a zat thuak tawh a ni.
National TB Elimination Programme hotute chuan, TB nantna hi ei leh in tha hmu lo, ei loten an vei duh hle tih sawiin, hemi avang hian TB vei te chu ei leh in tha pek an ngai a, sorkar pawhin hemi hi ngaipawimawhin TB damlo puihna tur scheme a siam a, thla tin Rs 500 pek an ni.
He scheme bakah hian TB dam lo ten chaw tha eina tur pe duh tan scheme siam leh a ni tih sawiin, Mizoramah pawh sorkar hotu leh mi thil phalten donation hi an pe thin tih sawiin, “Tunah hian donation pe hi awm ve nual tawh mah se an la tam tawk loh avangin mipuite TB damlote tana luang chhuak nasa zual turin kan sawm a ni,” an ti.