Aizawl: Labour, Employment, Skill Development & Entrepreneurship Department (LESDE) buatsaih PÛM-2023, Innovation Competition & Exhibition Fair chu nimin atang khan Industrial Training Institute (ITI) Campus-ah neih tan a ni.
PUM 2023 hi Chief Secretary Dr. Renu Sharma chuan hawngin, eizawnna kawng hawng tura kutthemthiamna leh thilsiamchhuah lama thiamna neite tana remchanna buatsaih a, mahni kutkawih ngeia ei an zawn theih nana hmalak zel chu sorkar in a ngaih pawimawh thu a sawi.
Dr. Renu Sharma chuan inelna rilru tel lo chuan hmasawnna tha zawk, kalphung tha zawk siamchhuah emaw hmuhchhuah emaw a harsat thin thu a sawi a, PUM a telte leh chhimtute’n an hlawkpui ngei a beisei thu a sawi bawk.
PÛM-2023 hi sorkar laipui scheme Skills Strengthening for Industrial Value Enhancement (STRIVE) atang leh Atal Incubation Centre-SELCO Foundation (AICSF) Guwahati te sum hmanga buatsaih a ni.
PUM 2023 ah hian Engineering leh Non-Engineering Group ah then a ni a. Engineering ah hian mi 28 telin Non-engineering-ah 35, a vaiin 63 an tel a, heng bakah hian sawm bik Innovator leh entrepreneur stall hawng pariat an awm bawk a. Naktukah ITI leh college dang zirlaite leh a duh apiang chhim turin chawhma dar 10 atangin Entrepreneurship Workshop buatsaih a ni ang.
PUM Mizoram Innovation Fair hi kum 2021 leh 2022 PUM competition a tel zingah eizawnna kawnga hlawhtling thahnem tak an awm tawh a ni.