Aizawl: Manipur-a Zohnahthlak pawl hrang hrangte inthlunkhawmna pawl, ‘Zo United’ hruaitu turte ruat fel a ni.
Nimin khan Zo United-a tel pawl hrang hrang hruaitute chu Central YMA hall-ah an thukhawm a, hruaitu tur inruatin, Convener atan MPC hruaitu Albert L. Renthlei, Co-Convener atan mi pahnih – Zomi Council hruaitu John K. Ngaihte leh Kuki Inpui hruaitu Ajang Khongsai te ruat an ni a, secretary (recording)-ah Lalhrillien, Hmar Inpui, Secretary (Finance)-ah Thanglen Kipgen leh Secretary (Information & Publicity)-ah Pagin Haokip ruat a ni a, OB bakah hian pawl hrang hrang aiawh tur committee member an ruat bawk a ni.
Manipur sorkara Zohnahthlak zinga Cabinet Minister Letpao Haokip-a’n a kaihhruai thutkhawmah hian Zohnahthlak pawl hrang hrang hruaitu mi 48, Zo hnahthlak minister pahnih leh MLA panga an tel.
Pawl hrang hrang aiawh kalkhawmte hian NGO Coordination Mizoram kaihhruainaa Zo United lo din tawh chu tha taka a kal theihnan inlungrual taka thawhho an duh thu an sawi a ni.