Aizawl: MNF party chuan nimin khan Mizoram hmun hrang hrangah MNF-in zalenna an sual laia nun chânte hriatrengna ni, Martar Day an hmang a, an president, Zoramthanga’n Mizo hnam damchhuahna awm chhun chu nationalism a nih thu a sawi.
MNF president Zorama chuan Mizo Hnam Runa, Martar Day hmanna inkhawmah thu sawiin, “He hnam thinlung hi a rei tulh tulh a, hnam tlem zawk tan chuan a hlu tulh tulh a, dam chhuahna awm chhun a ni,” a ti.
Mizoram chu martarte thisena baptis a nih thu sawiin, Mizo hnam chu ral trep thin mah se hnam thuthlung ‘Pathian leh kan ram tan’ tih kengtuten harasatna karah an vuan tlat zel a, a rawn tho chhuak leh thin tih a sawi.
Zorama chuan tunlai politics boruak sawi bawkin, party pakhatin MNF chu chhia zawng zawng an bel a, Congress, PC leh Union sorkar-te pawh chhe hlawm vek angin an chhuah thin tih a sawi a, “|hangtharte rilruah dik lo takin zirtirna an kalpui a, mite an fuihpawrh bawk a, hetihlai hian a sut turin Pathianin ‘thil thleng’ a rawn thlentir zel,” a ti a; kalphung thar au puitute chu an chief minister kal vut vut tawh tiin, a lo thlen hma pawh hian kan zo lo nghal a ni, a ti bawk.
Aizawl baka khaw hrang hranga Martarte Ni hmanna chu MNF general headquarters hruaitu’n an hman pui a, MNF Vice President Lalthlengliana chu Kolasib Venglaia, Taitesena Hall-a Martarte ni hmannaah khuallian a ni a, Mizo Nationalism chu an ngaisang a, chawisan leh tun din zel chu MNF thil tum a ni tih a sawi.
MNF-in zalenna a sual laia Hnam sipaite kha anmahni tan bei an ni lo tih sawiin, “Mizoram leh hnam tan an bei zawk a ni,” a ti a. Inremna neih dan sawiin, Kohhran aiawh leh NGO-ten inhnuk hniam tura Pu Denga an ngen angin inremna an lo nei ta tih a sawi.
MNF hruaitu dang MNF Adviser Dr R Lalthangliana chuan Serchhipa Martarte ni puala hun hmanna a hmanpui a, MNF Adviser, Minister Pu Lalchhandama Ralte chuan Darlawnah hun a hmang bawk.