Paris Saint-Germain in UEFA Champions League-ah hnehna nen bul an tan a, group hautak ber a ngaih Group F a inkhelah Borussia Dortmund 2-0 in an hneh.
Parc des Princes-ah hian Paris khaw club tan Kylian Mbappe chu hnehna channa kawnga bul tantu ah a tang leh a. First half a goal a luh loh hnuah second half tan tirah penalty a hlawhchhuak a, aman goal-ah a khung.
PSG hian Moroccan defender Achraf Hakimi hmangin goal an khung belh a. He inkhela kheltha tak midfielder Vitinha nena Dortmund tlarhnung thiah nan a ball an inpe a mawi.
Paris Saint Germain hian inkhelah ball chang hnem zawkin chance tha zawk siam thin an ni bawk a. Mahse hun rei tak chhung Dortmund in an veng tha.
German club hian chance tha an insiam fo tur chu dang thei thinin an lamah vanneihna a tang bawk a. Vitinha leh striker Randal Kolo Muani ten goal ban an tih per ve ve.
Niklas Sule handball avanga penalty atanga goal an khung hnuah PSG in inrintawkna neih belhin huntawp hma in goal khung pawm loh an nei bawk.
PSG coach Luis Enrique chuan, “Ka lawmna ber chu kan inkhel kha a mar tha hle. Inkhel tir atanga a tawp thlengin kan tlahniam mang lova, theihtawp chhuahin kan tang tluan thak thei a ni.” tiin a sawi.
Newcastle in point hmu
Kum 20 hnua UCL an khelh leh hmasak berah Newcastle United in point an hmu a, goal inpe lova inhnehtawk turin AC Milan an chelh.
San Siro-ah first half-ah Milan an che tha viau a, Magpies goalkeeper Nick Pope chuan Olivier Giroud leh Theo Hernandez te goal khung tur a dansak.
Inkhel tawp thlengin Newcastle United an tan khawng viau a ngai a. Mahse point an hmu hi an manager Eddie Howe chu a lungawi.
“Helai hmuna inkhelh hautakzia hi ngaihthah theih a ni lo. Tam tak tan thil thar a ni a, inkhel boruak poawh a danglam hle. Hei vang hian vawiinah zirlai tha tak kan dawng a ni.” a ti.
Champion lai an chak
Group G-ah champion lai Manchester City in goal chhuah hmasa mahse goal thumin an chhanglet a, Crvena zvezda chu 3-1 in an hneh.
Etihad Stadium-ah Serbian champion hian first half-ah Osman Bukari hmangin goal an khung a. Halftime-ah 1-0 in hma an hruai.
Nimahsela City an ngawi reng lova. An khingpui, khawthlang lam ina Red Star Belgrade tia an hriatlar lakah hian Julian Alvarez chuan goal hnih khungin Rodri-a’n goal dang a khung.
An group inkhel dangah RB Leipzig in Mohamed Simakan, Xaver Schlager leh Benjamin Sesko te goal khung hmangin 3-1 in Young Boys an hneh.