Mizoram Police-in August 21, 2023 atang khan zu leh ruihhlo do beihpui a thlak a, Thawhlehni thleng khan ruihhlo chi hrang hrang Rs nuai 2,369.2 man hu an man tawh.
Mizoram Police Media Cell, PHQ thuchhuahin a tarlan danin, Mizoram MLA inthlanpui lo awm tur tluang tak leh muanawm taka neih a nih theih nan Mizoram Police te chuan August ni 21 atang khan zu leh ruihhlo do beihpui (special drive) an thlak a, ruihhlo thahnem tak an man tawh a ni.
Ruihhlo an mante chu Rs nuai 29.76 hu rakzu litres 5,953.25 , zu bilh lai litres sing 30360, cheng nuai 569.10 hu Heroin Kg 18.97 te, cheng nuai 724.36 man hu meth Kg 55.72 te, cheng nuai 930 man hu Cystal meth Kg 3.100 te an man.
Heng bakah hian sap zu, Beer, BEDC, FIL, Ganja, Codeine engmawzat an man bawk a. Heng ruihhlo an man zawng zawng hi cheng nuai sang hnih zathum sawmruk pakua leh point 2 man a ni. Henga tarlan bakah hian zu siamna hmunpui engemawzat tihchhiat a ni tawh bawk.