Prime Minister Narendra Modi chuan Inrinnia eptu party hrang hrang 23 tanghoten Kolkata-a United India Rally an neih chu bei letin, “Keini chuan mi vbc 125 kan thawhhopui mek a, tunge chak zawk ang?” a ti.
Prime minister hian nimin khan video conferencing hmangin district 5-a an party booth worker-te kawm kualin, West Bengal chief minister leh Trinamool Congress hruaitu, Mamata Banerjee-i huaihawta eptu party eng emaw zatin vantlang inkhawm an huaihawt chungchang hi a sawi chhuak a, “Anmahni theuhvin thawhpui an nei a. Keini chuan ram mipui vbc 125 zet kan thawhpui mek a, tu thawkho hi nge chak zawk ang? Kolakata-a hruaitu inlante kha mi thiltithei tak tak fate emaw, anmahni fate chher tumtute an ni,” a ti.
Prime minister chuan, “He thawhhona hi a danglam khawp mai. Mi hausate intelkhawmna a ni a, patea, tupa leh tunu tih velte a ni a; eiru tangho, scam tangho, a chhe lam tangho, intluktlan lohna tangho a ni,” a ti bawk.
Modi chuan a party leh a sorkar hnathawh avangin eptute an mu thei lo zawk niin a sawi bawk a, “Eptute hi kumin inthlanpuiah an chak loh dawn avangin chhuanlam an siam lawk a ni,” a ti bawk.
Inrinnia Kolkata-a Brigade ground-a eptute punkhawmnaah hian Electronic Voting Machine sawisel tawk an awm chu chhangin, “Party tinin inthlanah hian hnehna chan kan duh vek a, party thenkhat chuan mawl takin, mipui bum nan thil sawisel an ching,” a ti a. Jammu & Kashmir chief minister hlui, Farooq Abdullah-an Election Commission-ah kala EVM hmang tawh lo tura an duh thu thlen an tum tih a sawi chu a chhang a ni.