Rajasthan chief minster Ashok Gehlot chuan an state chhunga zu zawrh chu khuahkhirhna khauh tak thupek a siam a, zan dar 8:00 hnu lamah zu hralh chhuah a khap.
“Zan dar 8:00 hnu lama hralh chhuakte chu hrem an ni ang a, an dawr an kharsak an ni ang a, zawrh phalna an neih (licence) pawh tihtawp (cancel) a ni ang,” tiin Excise Department thuneitute hnenah thupek a chhuah a ni.
Chief Minister’s Office (CMO)-a thuneitu sang rualte nena an meeting-naah chief minister Gehlot chuan, “Kum 2008 khan kan sorkar chuan hetiang hi kan lo kalpuiin zan dar 8:00 hnu lama hralh kha kan khap a, khe khan khawtlang nuna a tha zawngin nghawng a nei a ni,” a ti.
Meeting-ah hian zu zuar tam takin hralhna tura man sang ber bituk (Maximum Selling Price) aia sangin an hralh thin tih sawi a ni bawk a. Gehlot chuan hetiang tite lakah hian khauh zawka dan lek turin a ti bawk.
Chief minister hian an state chhunga dan lova zu phur/tawlh thinte pawh chak leh na zawka vai turin a ti bawk.