Deputy Chief Minister Tawnluia’n chhung tin hnena tui thianghlim pekna tura sorkar laipui scheme, Jal Jeevan Mission (JJM) hnuaiah khaw 674 tuam a nih tawh thu a sawi.
Tawnluia chuan nimin khan Aizawl Press Club-ah thuthar thehdarhtute a kawm a, kum 2018 atanga 2023 chhunga a department enkawl hrang hrangte hmalaknate a sawifiah a, a enkawl PHE department kaltlangin JJM hnuaiah khaw 674 an tuam tawh tih te, tui connection pek vek tawhna khua chu 352 a nih thu te, hmalak mekna khaw 322 a awm thu te a sawi a; JJM atana sum mamawh zat chu Rs. vaibelchhe 1,529.61 a ni a, sum an hmuh tawh chu Rs. vaibelchhe 1,120.44 a nih thu a sawi.
Deputy chief minister chuan Aizawl Smart City Limited hnuaia an hmalaknate tar langin Aizawl khawpui traffic control system tihchangtlunna atan Rs. nuai 61 sengin hmun 10-ah pelican crossing siamin zebra crossing-te siam a nih thu a sawi.
Hmeichhiaten laklawh thilah pawh awlsam taka sanitary pad an lak mai theihna turin Rs. nuai 198 sengin hmun 76-ah sanitary pad bawm leh a hal ralna hun a nih thu te, Aizawl khawpui hmun 24-ah dringking water kiosk bun a ni thu te a sawi.
Kum 2019-2023 chhungin NULM hnuaiah khawpuia mi harsa 4,161 hnenah free skill training pek a nih thu leh an zinga mi 2,391-te chu an zir zawh hlimah hna hmuhsak an nih thu te, 2019 – 2023 chhungin NULM hnuaiah self help group 468 dinin revolving fund Rs. 10,000 theuh pek an ni a, 2019-2023 chhungin mi mal loan mi 1,036, pawl 16 leh SHG 158 te hnenah pek chhuah a nih thu a sawi bakah department hmalakna hrang hrangte a sawi bawk a ni.