Chief Minister Zoramthanga’n Covid-19 leng lovin hna thawk thei se chuan kum nga chhungin Mizoram chu sang takah a awm a rin thu a sawi.
He thu hi nimin Mizoram Finance & Account Service Association (MFASA) inkhawmpui a hmanpuinaah a sawi a, Zorama chuan Covid-19 hripui leng avangin state sorkarin hna a thawhna tur sum tak tak hmuh theih a ni lo a, chumi avang chuan an beisei ang takin hna an thawk thei lo tih sawiin, “Thawk thei ni ila chu tun kum nga chhung hian Mizoram hi sang takah kan awm ka ring a ni,” a ti.
Chief minister chuan Mizoram leilung hausakna chu nasa zawk hai chhuah a nih chuan nasa taka chawikan theih a ni tih a hmuh chian thu a sawi a. Thei leh thlai lam tharchhuah tam a ngaih thu te, thar chhuahte phurh chhuahna tur kawng tha mamawh a nih thu te sawi a, “Kan thar chhuahte khawpui lian a thlen theih nan Lengpui Airport pawh thuam that chhoh zel a ni,” a ti a, heng hmasawnna tura hmabak la awmte chu chonaah ngaia finance lam mi thiamte pawhin anmahni zawnah theihtawp chhuah turin a sawm a ni.
MFASA General Conference vawi 28-na, Woodland Hill, Zonuama neihah hian an member boralte sunna hunte hmangin rorel inkhawm an neih bakah pawl hruaitu thar an thlang bawk.