India-a ruihhlo leh dan phal loh tawlhruk lam viltute chuan Gujarat-a lawngchawlhna lianah heroin tonne thum dawn an man a, $ tluklehdingawn 2.7 man vel zet nia sawi a ni.
Forensic hmanga endik hna kalpui mek a la ni a, a man zat dik tak hi hriat theih a la ni lo thung niin thuneituten an sawi.
Mi pahnih an man tel a, mi dang pawh an inhnamhnawih em tih chhui zui mek an nih thu thuchhuah an siamah an tar lang.
Ruihhlo hi Afghanistan atanga thawn chhuah niin talc stone angin an chhal a ni.
Iran a thlen hnuah Gujarat-a Mundra port pan lehin man a ni ta a ni.
Directorate of Revenue Intelligence (DRI) chuan Iran-a Bandar Abbas Port atangin ruihhlo nia rin tam tham tak phurh luh a awm thu an dawn bawhzuiin an man tih a sawi.
Intelligent-te chuan he thil hi chhim lama Vijaywada khawpuia company pakhat chah luh a ni tih an sawi bawk.
“Kan officer-ten bungrua hi an man a, an endik a, bawm (container) pakhatah ruihhlo ni ngeia hriat an hmu a, a hnuah heroin a ni tih finfiah a ni ta a ni,” tiin DRI chuan thuchhuah a siam.
He thil an man hnuah hian India-a khawpui lian hrang hrang, Delhi, Ahmedabad leh Chennai pawh telin, he thila inhnamhnawih nia an rin an dap zui nghal.
“Kan chhuinaah chuan Afghan mite pawh an inrawlh ngei niin kan hria a, kan chhui zui mek zel a ni,” an ti.
United Nations Office on Drugs and Crime (UNODC)-in a chhinchhiah dan chuan Afghanistan hi khawvela opium thar chhuak tam ber ram a ni a. An thar chhuah hi khawvel puma opium thar chhuah 80% ai pawhin a tam zawk.
Opium poppy hi sawngbawl a nih hnuah ngawlvei awl tak tak ruihhlovah an siam thin a, heng zingah hian heroin pawh a tel.