Mit hriselna
Nausen mit chu enkawl ngun hle tur a ni. Nausen a muthilh laiin, a mita tho a fuka, natna a rawn hnawih loh nan thosilen zar hnan rawh.
Naupang lehkha zirna sikul pindan chu a eng tawk tur a ni. Naupang kete chuan rem taka chhuat a rah phak nan an thutna pawh a hniam tawk tur a ni; an dawhkan pawh hniam deuh ni rawh se, naupangte chuan thu ngil auhva dawhkana lehkhabu an chhiar huna an mit chu fit khat vela hlaah a awm theih nan.
Lehkhabu ziak hraw chiang kek kawk tak naupang chu pek tur a ni. Naupang chuan sentut emaw, khawsik sen emaw zawnghri emaw a vei chuan a dam chian var hma loh chuan skul kaitir tur a ni lo, heng natnate hian mit leh taksa dang r eng reng pawh a tihchakloh thin avangin.
Hliamna leh natna laka mit humhim nan kan sawi tawh bakah hian hengte hi kan ngaihpawimawh a tul a ni.
- Eng fiah tawk lovah chuan ngun deuhva en ngai, puan thui mawi angte hi ti reng reng suh.
- Lehkha chhiarin khawnvar lam hawiin thu suh la, koki chung lam, tukkhum lam atanga eng chuan lehkhabu a rawn en hi a tha zawk a ni.
- Lehkha chhiar laiin emaw, eng hna pawh rilru hman fo tulna chiah phawt chuan, second tlemte han chhin sek emaw, tukverha dah chhuah a, van dumpawl thiang emaw, thing hring emaw, hlobet hring emaw minit tlem han melhin, mit chu chawlhtir zeuh zeuh tur a ni.
- Vaivut emaw, bawlhhlawh engpawh mita a luh phawt chuan, mit chu nuai suh la, saline tuiin bawlhhlawh awm chu tleuh chhuak mai zawk rawh. Saline naran a awm mai loh chuan tuiso dah daih lum pip pep hmang rawh.
- Vantlang hman tawm chawhtawlh te, inhruk puan te, sabon te, hmai phihna puan te hmang suh. A hmang hmasatuten “mit na” an lo vei mai thei, i hman ve avangin chung natna thenkhatte chu i kai thei a ni.
- Meikhu hian mit a tichhe viau thei a ni. Thuk (stove) chuan meikhu chhuahna tha tawk a neih loh chuan, in chhung chu mit tithip thei meikhu chuan a khat mup mup mai ang. Ni tin vawi thum ni tin maia tihkhuk mup mup fo chuan chhungkuaa mi tin mit chu a hliam thin. Senso tam vak ngai lovin, meikhu chhuahna chu a siam mai theih a, chuvangin he hrehawmna leh inhliamna tireh tur hian meikhu chhuahnate chu siam ngei tur a ni.
Beng Hriselna
Ngun taka beng hi enchian chuan bung hrang pathumah a in\hen tih a hmuh theih. Pawn lama lang thei zawng hi chu chingal thlawr bur ang deuhva siam, beng chhung lam leh lairil lama ri lo dawngluttu atan siam a ni.
Beng lai hi hrawk nen, dâwt te tak te (Eustachian tube)-in a zawm a. Mi a lo hritlan a, hnar leh hrawka hnap a lo awm hian hrawk vun chhunglam pan takte chu an lo vung a, chu chuan dawt chu a tiping a. Hei hi rei lo te chhung beng tingawngtu pakhat chu a ni.
Eustachian tube-in natna a neih chuan beng lai pawh a rawn kai a. Hnai a laka beng lai a khah hian, beng chu a na thin a ni. Hnai a lo tam lutuk chuan beng dar (tympanic membrane) chu a rawn tawn a, a rawn su tet a. Chutah beng hnai lo chhuak chu kan hmu thin a ni.
Beng enkawlnaah hian heng hi zawm tur a ni:
- Beng ek hian pawimawhna riau a nei. A kha em em a, chuvangin ran nung reng reng an lut duh lo, an thlawk lut palh a nih ngawt loh chuan, beng ek hi kher tur a ni lo. Beng ek chu a lo khal a, beng a tih ngawn erawh chuan tihfai tur a ni. Damlo chu chair-ah thuttir la, tuilum quart khat la la, Syringe hmangin bengek a lo chhuah hma loh chu thuah rawh.
Beng kawrawng chhunga hmul hian rannung leh vaivut lut tur lo dalin, hna pawimawh tak a thawk a ni. Heng hmul hi lu mettute meh tir suh.
- Benga rannung a luh chuan, a tih chhuah dan tha ber chu chhawhchhi hriak emaw, hriak thlum thianghlim dang emaw lum deuh pip pep benga far luhtir hi a ni. Hei hian rannung chu a chiah chhuah loh vek pawhin a tihlum a, chu chu tuilum pawhin a thuah chhuah theih a ni.
- Hnap hnit vak suh; hei hian hnar leh hrawk natna hrikte chu Eustachian tube kal tlangin beng laiah a rawn ham lut ang a, beng a ngawng mai ang.
- Naupangte hi an beng hupin beng reng reng suh. Chutianga tih chuan beng a hliamin a ngawng hlauh theih a ni.