Japanese pitar pahnih, phir unau chu Guinness World Records chuan phir zinga upa ber tiin a puang a, kum 107 leh ni 300-a upa an ni tawh.
Umeno Sumiyama leh Koume Kodama hian Japanese phir unau, Kin Narita leh Gin Kanie ten record an lo siam tawh chu an khum a ni.
Umeno leh a laizawn, Koume hi mi kawm peih tak nia hriat an ni a, November 5, 1913 khan Shodoshima thliarkarah an piang a ni.
Phir upa ber an ni tih hi Thawhtanni, Japan rama Respect for the Aged Day ni-ah chiah puan a ni.
Tun laia Covid-19 leng mek avangin an unau hian record an siam tih lanna certificate hi a ruala hlan theih an ni lo va. Japan hmun hran daihah an cheng bawk a, official certificate hi an awmna, care home-a thawkte kaltlanga hlan an ni.
Guinness-in Thawhtannia thuchhuah an siamah chuan an unau hian September 1 khan record thar an siam tih an tar lang.
A hmaa phir unau upa ber ni thin, Kin leh Gin te hi kum 107 leh 175 an ni hman tihin Kin-i hi January, 2000 khan a thi a. Gin-i pawh a kum lehah kum 108 mi niin a thi zui bawk.
Kin-i leh Gin-i te unau hi Japanese tawnga rangkachak leh tangkarua tihna a ni a, August 1, 1892 khan Nagoya-ah an piang a. An hun tawp lam eng emaw chen chu phir upa ber an nih avang hian an larin lawm an hlawh hle.
Umeno leh Koume unau hian hetiang zat kum an thleng thei hi fiamthu thawh nan pawh an hmang ve nasa hle niin an chhungte chuan an sawi.
Umeno-i hian fa pali a nei a, Koume-i hian pathum a nei ve thung.
Japan ram hi khawvela mihring an dam reina ber a ni a, kum upate hi an zah thiam em em bawk.
Guinness-in dam lai zinga dam rei ber a chhinchhiah mek bawk Japanese tho niin kum 118 mi a ni tawh a, Kane Tanaka-i a ni.