Champion lai panga zinga pathumin hming an pe lut a, hun tawp thlengin Tata SK 612 LPS Pro Fight-a tel tumin boxer 395-in lehkha an theh lut.
Nilaini thleng hun hawn a ni a, hun hnuhnungah welterweight champion lai C Lalhruaitluanga leh vawi nga champion ni tawh NT Lalbiakkima’n hming an pe lut.
Champion lai panga zingah bantamweight a insawn tumin flyweight champion Laldinsanga a tel dawn a, nikuma best boxer Ramthar Lunglei tlangval hian professional vawi nga khel tawhin hnehna a chang vek a, tun tumah pawh ngaihven hlawh tur zinga mi a ni.
Bantamweight champion Lalrinngheta’n lightweight title chuh a tum ve thung a, kum 21 mi Tuipui boxer hian nikum Pro Fight atangin professional a luhchilh a, vawi thum inhnek tawhin a chak vek.
Hruaia’n welterweight kalsanin middleweight-ah chona thar hmachhawn a tum a, kum 25 mi Chawngtlai boxer hian professional-ah hnuhma tha tak neiin vawi ruk a khelh tawhah chak vekin mi pathum a knockout.
Champion lai zingah featherweight title kawltu Lalrosangzuala leh lightweight champion Vanlalawmpuia’n lehkha an theh lut lo va, Rosanga hian mi mal hna avangin harsatna a nei a, Awpa’n lightweight title humhim tum mahse a rilru thlakin WBC India title chuh dan kawng a dap a, tel turin hming a pe lut ta lo.
Hetih lai hian champion lai mi pathum bakah champion tawh mi pathum an inlan dawn a, nikum khan New Siaha chhuanvawr Biakkima a tel lo va, tun tumah Pro Fight chanchina vawi ruk champion hmasa ber nih tumin flyweight title a chuh dawn ang.
2019 middleweight champion C Lalduhawma’n middleweight champion nih leh ngei a tum bawk a, nikum khan middleweight telh a nih loh avangin kum 26 mi Ramhlun South boxer a tel lo va, professional boxing a khelh tawh vawi hnihah knockout-in a chak ve ve a, Hruaia nen an intawng thei dawn.
2015 bantamweight champion HC Lalramfela’n weight hrang pahniha champion tumin fiahna a hmachhawn leh dawn a, nikum khan lightweight title fight-ah Awpa a hneh lo va, kuminah bantam champion Rinngheta nen lightweight champion nih tumin weight khatah an awm dun thei ang.
Kum kal ta khan boxer 211 an tel a, kuminah 395 inziak lutin karleh Thawhlehni zing dar 8 atangin LPS Huan, Falkland Vengah an hriselna endikin an inbuk dawn a, September 30 Inrinniah LPS Office, Zarkawtah fixture tar chhuah tur a ni a, October 2-ah tan a ni ang.