Mizoram Primary Teachers Association (MPTA)-in nimin khan Zarkawt Community hall-ah zirlaite chhawmdawlna an sem a. School Education Minister Lalchhandama Ralte-in he hun hi a hmanpui.
School Education Minister chuan MPTA-in zirlai harsate chhawmdawlna an sem chu ropui a tih thu a sawi a. Midang te tana malsawmna nih aia hlu mihring dam chhanah a awm lo tih sawiin, uar leh zuala kalpui zel turin a chah.
MPTA chu service association-a member ngah ber, thingtlang kilkhawr zawng zawng huap ni mahse, an hruaitu ten an tamna chhuanga sorkar an dawr ngai loh thu leh fakawm a tih thu a sawi a. MPTA-in zirna tihhmasawnna atana sorkar an thawhpuina, thlawpna leh fuihnaah lawmthu a hrilh bawk.
Zirlaite chu chhawmdawlna an dawn te hmang tangkaia anmahni fuihtu leh nawr kaltu atana hmang turin a Minister chuan a chah a. Mi puitling, ramin tangkai taka a chhawr leh fa hrin manhla an ni thei tih hriaa, taimakna leh tumruhna nen an zirna kawng zawh turin a chah bawk a ni.
MPTA hian Students Endowment Fund – zirlai harsa chhawmdawlna dawng tur mi 36 an thlan te hnenah Rs. 5000 bakah T-Shirt, Kekawr leh Lukhum an pe theuh a. Anmah hruaitu an chhungte nen haw lam leh kal lam TA/DA an pe bawk.
Students Endowment Fund hi MPTA chuan kum 2022 atang khan a sem tan a ni.